Ally McCoist amshauri kinda wa Arsenal Max Dowman kwenda Rangers

Kinda wa Arsenal ajipatia umaarufu

Kinda mwenye kipaji kikubwa ndani ya klabu ya Arsenal, Max Dowman, anatajwa kuwa kwenye orodha ya wachezaji wanaoweza kutolewa kwa mkopo ili kupata uzoefu zaidi wa soka la ushindani. Mchezaji huyu mwenye umri wa miaka 16 amekuwa akivutia wadau wengi wa soka kutokana na kiwango chake bora.

Hivi karibuni, Dowman alionyesha makali yake katika mchezo wa Carabao Cup ambapo alifunga mabao mawili katika ushindi wa 4-2 dhidi ya Ipswich Town, tukio ambalo limethibitisha kuwa kinda huyu anastahili kupewa nafasi ya kukua zaidi.

Kauli ya Arteta kuhusu maendeleo ya kinda huyo

Kocha mkuu wa Arsenal, Mikel Arteta, ameweka wazi kuwa klabu itakuwa ikitathmini hali ya mchezaji huyo kila baada ya miezi sita ili kuona ni wapi panamfaa zaidi kwa ajili ya maendeleo yake ya baadaye.

“Tutakuwa tukitathmini kila baada ya miezi sita hali ilivyo na nini ni bora zaidi kwa ajili yake, kisha tutafanya maamuzi sahihi. Inategemea mambo mengi; kile anachohitaji, kile timu inachohitaji, nafasi zilizopo kikosini, na dakika anazocheza,” alisema Arteta kuelekea mchezo dhidi ya Brighton.

Arteta aliongeza kuwa kwa sasa lengo ni kumfanya Dowman awe sehemu ya kikosi cha kwanza na kumpa nafasi ya kuleta mchango katika timu, lakini mlango wa mkopo haujafungwa endapo itaonekana ni hatua sahihi kwa mustakabali wake.

Ushauri wa Ally McCoist

Gwiji wa soka Ally McCoist amejitokeza na kutoa ushauri wake kwa kinda huyo, akimpendekeza kujiunga na klabu ya Rangers inayoshiriki ligi ya Scotland kwa mkopo. McCoist anaamini kuwa Rangers itakuwa sehemu nzuri kwa kijana huyo kupata uzoefu wa ligi ngumu.

“Ndiyo, ningemchukua asilimia 100 pale Ibrox. Sioni shida kama Mikel Arteta atadhani ni jambo bora zaidi kwa maendeleo yake. Nakumbuka tulizungumza hivi kuhusu Phil Foden, na ilionekana kuwa na pande zote mbili za shilingi, lakini mimi sioni tatizo yeye kwenda kupata dakika nyingi za kucheza,” alieleza McCoist kupitia talkSPORT.

McCoist anaamini kuwa kucheza soka la ushindani nje ya mazingira ya sasa ya Arsenal kutamsaidia Dowman kujiimarisha na kurejea klabuni hapo akiwa mchezaji aliyekamilika zaidi, akitolea mfano wa jinsi wachezaji wengine walivyoweza kupiga hatua kwa njia hiyo.