Andy Robertson: Spurs wanaanza safari mpya, waachane na mzigo wa misimu iliyopita

Safari mpya kwa Spurs chini ya De Zerbi

Beki Andy Robertson ametoa wito kwa wachezaji na mashabiki wa Tottenham Hotspur kutazama mbele na kuacha kubeba ‘mzigo’ wa misimu miwili iliyopita ambayo ilikuwa migumu kwa klabu hiyo.

Tottenham imekuwa na mwanzo mbaya wa msimu huu, ikiwa haijashinda mchezo wowote katika mechi tano za kwanza za Ligi Kuu ya England, hali inayowaacha wakiburuza mkia kwenye msimamo wa ligi. Hii ni baada ya kumaliza katika nafasi ya 17 kwa misimu miwili mfululizo, jambo ambalo Robertson anaamini bado linaathiri kisaikolojia kikosi cha sasa.

‘Mzigo’ wa matokeo mabaya

Akizungumza kwenye podikasti ya Stick to Football, Robertson ambaye alijiunga na Spurs msimu huu kama mchezaji huru, amekiri kuwa maumivu ya misimu ya hivi karibuni bado yanawakwaza wachezaji wanapokuwa uwanjani.

“Wamekuwa na misimu miwili migumu sana katika suala la nafasi waliyomaliza kwenye ligi. Wamelazimika kuingia sokoni na kutumia kiasi kikubwa cha pesa, lakini naamini Tottenham sasa wanaanza safari mpya. Sijui safari hiyo itafika wapi, lakini ari ya kikosi hiki inaonyesha kuwa misimu iliyopita iliwaumiza sana.”

Jukumu la wachezaji wapya

Robertson amebainisha kuwa kocha Roberto De Zerbi anasisitiza wachezaji wapya kusaidia kuondoa mawazo hayo mabaya. Lengo ni kuhakikisha wachezaji hawakata tamaa pindi mambo yanapokwenda mrama uwanjani.

“Huo ndio ujumbe wa kwanza wa kocha. Pia, hilo linatupasa sisi wachezaji wapya, tunahitaji kusahau yaliyopita na kuirudisha Tottenham mahali tunapoamini inastahili kuwa,” aliongeza Robertson.

Imani kwa De Zerbi

Licha ya presha kubwa inayomkabili kocha huyo, Robertson anaamini kuwa De Zerbi ni kocha mwenye malengo makubwa anayotaka kushinda mataji na kushindana na vilabu vikubwa. Hata hivyo, amekiri kuwa wanahitaji kuanza kuonyesha matokeo mazuri mapema ili kutuliza hali ya sintofahamu.

“Kocha ana tamaa kubwa ya mafanikio. Anajua itachukua muda, lakini pia anajua tunahitaji kuanza kuonyesha matokeo mapema. Tunahitaji bahati kidogo, na kusahau yaliyopita ili kusonga mbele. Kadiri msimu unavyoendelea, tutazidi kuwa bora,” alihitimisha Robertson.

Tottenham wanatarajiwa kurejea dimbani Oktoba 10, ambapo watawafuata Manchester United katika mchezo ambao utakuwa muhimu kwa pande zote mbili kutafuta ushindi wa kwanza wa maana.