Arsenal kukamilisha dili la Ezri Konsa baada ya Leverkusen kugoma kumuuza Quansah

Arsenal yageukia dili la Ezri Konsa baada ya mlango kufungwa kwa Quansah

Klabu ya Arsenal inaonekana kuwa katika hatua za mwisho za kuimarisha safu yake ya ulinzi kwa kumsajili Ezri Konsa kutoka Aston Villa. Hatua hii inakuja baada ya juhudi zao za kumsaka mlinzi wa Bayer Leverkusen, Jarell Quansah, kugonga mwamba kutokana na klabu hiyo ya Ujerumani kugoma katakata kumwachia nyota huyo.

Kocha Mikel Arteta anatafuta beki mwenye uwezo wa kucheza nafasi nyingi uwanjani, hususan beki wa kati na beki wa kulia, ili kuziba nafasi za wachezaji wake muhimu kama William Saliba na Jurrien Timber ambao kwa sasa wanasumbuliwa na majeraha. Saliba anatarajiwa kukosa mechi za mwanzo wa msimu kutokana na maumivu ya mgongo aliyopata kwenye Kombe la Dunia, huku Timber akiendelea kusumbuliwa na tatizo la nyonga.

Leverkusen wagoma kumuuza Quansah

Awali, ripoti zilikuwa zikionyesha kuwa Arsenal wameanza mazungumzo na Bayer Leverkusen kwa ajili ya kumnasa Quansah. Hata hivyo, kulingana na mwandishi wa Sky Germany, Florian Plettenberg, uongozi wa Leverkusen umetoa uamuzi thabiti kuwa mchezaji huyo hauzwi kwa sasa.

“Uamuzi wa ndani uko wazi: Jarell Quansah hauzwi kwa sasa na Bayer 04 Leverkusen. Pia hakuna kifungu cha mkataba cha kumuuza (release clause) wala kipengele cha kumnunua tena (buy-back option),” Plettenberg alithibitisha kupitia mtandao wa X.

Ezri Konsa ndiye chaguo sahihi

Inaonekana kutofanikiwa kwa dili la Quansah hakujawavunja moyo washika mitutu hao wa London, kwani lengo lao kuu limekuwa ni Ezri Konsa wa Aston Villa. Taarifa kutoka nchini Uingereza zinasema kuwa mazungumzo kati ya Arsenal, Aston Villa, na kambi ya mchezaji huyo yamefikia hatua nzuri sana.

Ripoti zinaeleza kuwa uhamisho wa Konsa wenye thamani ya takriban paundi milioni 60 uko kwenye hatua za mwisho, huku ikidaiwa kuwa mchezaji huyo mwenyewe ameshawaeleza uongozi wa Aston Villa nia yake ya kutaka kuondoka. Kwa sasa, mashabiki wa Arsenal wanatarajia kuona dili hili likikamilika rasmi ili kuimarisha kikosi kinachojiandaa na changamoto za msimu mpya.