Arsenal kumsaka mbadala wa Trossard: Christos Tzolis yupo tayari kutua Emirates

Hatima ya Trossard yazua mabadiliko Arsenal

Klabu ya Arsenal iko kwenye hatua muhimu za mabadiliko katika safu yao ya ushambuliaji, huku kiungo mshambuliaji wa kimataifa wa Ubelgiji, Leandro Trossard, akitarajiwa kutimka kuelekea nchini Uturuki kujiunga na Besiktas. Mwandishi maarufu wa habari za usajili, Fabrizio Romano, amethibitisha kuwa klabu hizo mbili zimeshafika mwafaka kuhusu ada ya uhamisho.

Besiktas wamekubali kutoa kiasi cha Euro milioni 18, pamoja na Euro milioni 2 za nyongeza, na sasa wanachosubiri ni ridhaa ya mwisho kutoka kwa mchezaji mwenyewe. Mazungumzo kati ya pande zote mbili yamekuwa ya kuridhisha, huku Besiktas wakimpa mchezaji huyo mkataba wa miaka mitatu na fursa ya kuongeza mwaka mmoja zaidi.

“Besiktas wana mkataba tayari na Arsenal kwa ajili ya Leandro Trossard. Kila kitu kiko tayari kuhusu mshahara na maslahi binafsi, kinachosubiriwa sasa ni taa ya kijani kutoka kwa mchezaji ambaye anajadiliana na familia yake kabla ya kuamua kuondoka London kwenda Uturuki,” alisema Romano.

Christos Tzolis: Namba moja ya kuchukua nafasi hiyo

Mara tu Trossard atakapotoa uamuzi wake wa mwisho na kuondoka, Arsenal wanatarajiwa kuharakisha mchakato wa kumsajili mbadala wake, na jina linalotajwa zaidi ni winga wa Club Brugge, Christos Tzolis. Mchezaji huyu raia wa Ugiriki mwenye umri wa miaka 24 amekuwa akihusishwa kwa karibu na The Gunners.

Inaelezwa kuwa Tzolis anatamani sana kujiunga na Arsenal kiasi kwamba amekataa ofa kutoka klabu nyingine zilizojaribu kuingilia kati ili kumsajili. Msimamo wake wa kuipa kipaumbele Arsenal umewapa imani wakubwa wa klabu hiyo ya London kuwa wanaweza kufanikisha dili hilo ambalo linatajwa kuwa na thamani ya karibu £35 milioni.

Mikakati ya Mikel Arteta

Kocha Mikel Arteta na mkurugenzi wa michezo, Andrea Berta, wamejipanga kuhakikisha kuwa safu ya ushambuliaji inabaki na makali licha ya kuondoka kwa Trossard. Ingawa Christos Tzolis ndiye anaonekana kuwa chaguo la karibu, ripoti zinaonyesha kuwa Arsenal bado wanaendelea na mipango mingine, ambapo jina la Morgan Rogers linaendelea kubaki kwenye orodha ya malengo yao makuu katika dirisha hili.

Kwa sasa, mashabiki wa Arsenal wanasubiri kuona maamuzi ya Trossard ili mchakato wa kuimarisha kikosi uendelee kwa kasi. Ni wazi kuwa dirisha hili la usajili linaweza kuwa na mabadiliko makubwa ndani ya kikosi cha Arteta kabla ya msimu kuanza.