Arsenal yaanza mazungumzo rasmi kumsajili Christos Tzolis kuziba nafasi ya Trossard

Arsenal yajipanga upya safu ya ushambuliaji

Klabu ya Arsenal imeanza rasmi hatua za kuimarisha safu yao ya ushambuliaji baada ya kufungua milango ya mazungumzo na klabu ya Club Brugge ya Ubelgiji kwa ajili ya kumsajili winga Christos Tzolis. Hatua hii imekuja mara baada ya kukamilika kwa makubaliano ya Leandro Trossard kuondoka klabuni hapo.

Trossard, raia wa Ubelgiji, anatarajiwa kutua nchini Uturuki kujiunga na klabu ya Besiktas kwa ada ya uhamisho inayotajwa kufika kiasi cha Euro milioni 20. Tayari Arsenal imethibitisha kuwa mchezaji huyo amesharuhusiwa kwenda Istanbul kufanyiwa vipimo vya afya na kukamilisha taratibu nyingine za usajili.

Tzolis ndiye chaguo la kwanza

Taarifa kutoka kwa wachambuzi wa soka barani Ulaya, akiwemo Fabrizio Romano, zimebainisha kuwa Arsenal ilikuwa ikisubiri mwanya wa Trossard kuondoka ili iweze kuingia sokoni kwa kasi kumpata mrithi wake. Christos Tzolis, mwenye umri wa miaka 24, anaonekana kuwa ndiye mchezaji anayepewa kipaumbele kikubwa na kocha Mikel Arteta pamoja na mkurugenzi wa michezo Andrea Berta.

Inaripotiwa kuwa mchezaji huyo mwenye asili ya Ugiriki ameshaonyesha nia ya kutaka kujiunga na washika mitutu hao wa London. Hata hivyo, kuliwahi kuwa na vilabu vingine vilivyokuwa vikitaka huduma yake, lakini Tzolis amekuwa akisubiri kwanza kusikia ofa kutoka Arsenal.

Mazungumzo yanaendelea

Ingawa hadi sasa Arsenal bado haijawasilisha ofa rasmi ya mezani, mawasiliano ya awali kati yao na uongozi wa Club Brugge yameshaanza. Mwandishi Sacha Tavolieri amethibitisha kuwa klabu hizo zimeanza mazungumzo ya kuchunguza uwezekano wa dili hilo kukamilika katika dirisha hili la usajili.

Kiwango cha Tzolis msimu uliopita kimevutia wengi, kwani alifanikiwa kufunga mabao 22 na kutoa pasi za mabao 29 katika michezo 52 aliyoichezea Club Brugge katika michuano yote. Takwimu hizi zinafanya Arsenal kuamini kuwa anaweza kuwa mbadala sahihi wa Trossard ambaye alikuwa nguzo muhimu kwenye safu ya ushambuliaji.

Wakati Arsenal ikifanya kila liwezekanalo kumpata Tzolis, inasemekana kuwa klabu hiyo pia inaendelea kufuatilia hali ya Morgan Rogers kama chaguo jingine kwenye mipango yao ya usajili.