Arsenal yafikia mwafaka kumsajili kiungo matata Ayyoub Bouaddi

Klabu ya Arsenal imefikia uamuzi mgumu lakini wa kimkakati katika harakati zake za kutaka kumsajili kiungo mwenye kipaji kikubwa kutoka nchini Ufaransa, Ayyoub Bouaddi. Habari mpya zinaeleza kuwa washika mitutu hao wa London wamekubali masharti yaliyowekwa na klabu yake ya Lille ili kufanikisha dili hilo kubwa.

Bouaddi, ambaye ana umri wa miaka 18 tu, amekuwa gumzo katika soka la Ulaya kutokana na kiwango chake bora alichokionyesha kwenye ligi ya Ufaransa (Ligue 1) ndani ya miezi 18 iliyopita. Vilevile, amewavutia wengi kwa mchango wake mkubwa akiwa na timu ya taifa ya Morocco katika mashindano ya Kombe la Dunia yanayoendelea.

Mkakati wa Lille kumuachia staa wao

Awali, klabu ya Lille ilikuwa imeweka wazi bei mbili tofauti kwa ajili ya kiungo huyo. Ili kumuachia mara moja bila masharti yoyote, klabu hiyo ilihitaji kiasi cha Euro milioni 100. Hata hivyo, Lille walikuwa na mpango mbadala wa kumuachia mchezaji huyo kwa bei iliyopunguzwa, ikikadiriwa kuwa kati ya Euro milioni 75 na 80, kwa sharti moja muhimu.

Sharti hilo ni kwa klabu itakayomsajili kumuacha Bouaddi kwa mkopo katika klabu ya Lille kwa msimu mmoja zaidi, ili aweze kupata uzoefu zaidi na kuichezea timu hiyo katika michuano ya Ligi ya Mabingwa Ulaya msimu ujao wa 2026/27.

Vita ya vigogo wa Ligi Kuu England

Awali, klabu kubwa za England zilitaka kumpata kijana huyo na kumjumuisha moja kwa moja kwenye vikosi vyao vya kwanza. Hata hivyo, mchuano umekuwa mkali huku timu kama Paris Saint-Germain na Real Madrid nazo zikimnyemelea kwa karibu.

Taarifa za uhakika zinasema kuwa Arsenal, Chelsea, na Manchester City sasa zimeamua kulegeza misimamo yao. Klabu hizi tatu zimekubaliana na ombi la Lille la kumsajili mchezaji huyo kisha kumuacha kwa mkopo wa mwaka mmoja, jambo ambalo linaonekana kuwa na uzito mkubwa katika kushawishi uamuzi wa Lille.

“Arsenal, Manchester City na Chelsea wote wamelegeza msimamo wao na sasa wako tayari kukubali mpango wa kumuacha mchezaji kwa mkopo ikiwa hiyo itawapa nafasi kubwa ya kumsajili mmoja wa vijana wenye vipaji vikubwa zaidi barani Ulaya,” imeeleza taarifa hiyo.

Liverpool na Man United wako mbioni kujitoa

Wakati Arsenal, Chelsea na City wakionekana tayari kukubali masharti hayo ili kumpata Bouaddi, hali ni tofauti kwa Liverpool na Manchester United. Klabu hizi mbili zinaonekana kutoridhishwa na wazo la kutoa kiasi kikubwa cha pesa kisha kukosa huduma ya mchezaji huyo kwa mwaka mzima.

Inatarajiwa kuwa Liverpool na Manchester United wanaweza kujitoa kwenye mbio za kumsajili kiungo huyo, jambo ambalo linaifanya Arsenal kuwa katika nafasi nzuri ya kumnasa staa huyu chipukizi katika kipindi hiki cha usajili.