Arsenal yajipanga kuimarisha safu ya ulinzi baada ya majeraha ya Saliba

Arsenal yatafuta mbadala wa Saliba

Klabu ya Arsenal iko kwenye harakati za kutafuta beki mpya wa kati kufuatia majeraha ya mlinzi wao tegemeo, William Saliba. Beki huyo wa kimataifa wa Ufaransa atakuwa nje ya uwanja kwa miezi kadhaa kutokana na majeraha aliyopata wakati wa michuano ya Kombe la Dunia, jambo ambalo limemlazimu mkurugenzi wa michezo wa Arsenal, Andrea Berta, kuanza kuangalia sokoni.

Ripoti zinaeleza kuwa Arsenal imekuwa ikifuatilia kwa karibu hali ya Ezri Konsa kutoka Aston Villa na beki wa Tottenham, Cristian Romero, ili kuziba pengo hilo katika kikosi cha Mikel Arteta.

Ezri Konsa ndiye mlengwa mkuu?

Kwa muda mrefu sasa, jina la Ezri Konsa limekuwa likihusishwa na kutua Emirates. Hata hivyo, changamoto kubwa imekuwa ni bei anayotaka Aston Villa ambayo inadaiwa kuwa karibu paundi milioni 60. Ingawa Arsenal imekuwa ikisita kutoa kiasi hicho cha pesa, taarifa za ndani zinaashiria kuwa Aston Villa inaweza kubadili msimamo na kukubali ofa inayokaribia kiasi hicho.

Aston Villa wana mpango wa kuhakikisha wanapata faida kubwa kwa beki huyo, ambaye bado ana miaka miwili kwenye mkataba wake. Inasemekana hata wako tayari kumuuza kipa wao, Emi Martinez, ili tu kubaki na Konsa, jambo linaloonyesha umuhimu wake katika mipango ya klabu hiyo ya Midlands.

Ugumu wa kumpata Cristian Romero

Kuhusu Cristian Romero, mambo yanaonekana kuwa magumu zaidi. Mchambuzi wa masuala ya usajili, Ben Jacobs, ameweka wazi kuwa uwezekano wa beki huyo wa Tottenham kuvuka kwenda Arsenal ni mdogo sana.

“Ni vigumu sana, isipokuwa kuwe na kipengele kwenye mkataba wake ambacho hatukijui, kwa sababu Tottenham hawataki kufanya biashara yoyote na Arsenal. Inahitaji pesa nyingi sana ambazo ni ‘astronomical’ ili hata kuanza mazungumzo,” alisema Jacobs.

Aidha, Romero anahusishwa zaidi na kutaka kuelekea soka la Hispania, ambapo klabu ya Atletico Madrid imekuwa ikijaribu kufanikisha usajili huo. Kwa hali ilivyo, Arsenal inabidi kutafakari kwa kina kama watawekeza kiasi kikubwa cha fedha kwa Konsa au kuendelea na mikakati mingine ya kusuka upya safu yao ya ulinzi kabla ya dirisha hili kufungwa.