Arsenal yajipanga kunasa saini ya Bruno Guimaraes, Newcastle yajihakikishia mbadala

Arsenal yakaribia kumnasa Bruno Guimaraes

Klabu ya Arsenal inaonekana kuwa katika hatua nzuri ya kukamilisha usajili wa kiungo nyota wa Newcastle United, Bruno Guimaraes. Hatua hii inakuja huku kukiwa na ripoti za uhakika kuwa Newcastle wamefikia makubaliano ya kumsajili mbadala wa kiungo huyo kutoka Monaco, Aladji Bamba.

Kocha Mikel Arteta amekuwa akimhitaji sana Guimaraes ili kuimarisha eneo lake la kiungo na kuleta ushindani kwa wachezaji kama Declan Rice na Martin Zubimendi. Inaripotiwa kuwa Arsenal wanatarajiwa kuwasilisha ofa mpya ya paundi milioni 70 ili kuvunja ngome ya Newcastle.

Uthibitisho wa Fabrizio Romano

Mtaalamu wa masuala ya usajili, Fabrizio Romano, amebainisha kuwa tayari mchezaji huyo ameshafikiana na Arsenal kuhusu maslahi binafsi. Ingawa Bruno bado anaheshimu mkataba wake na Newcastle, ameshaweka wazi nia yake ya kutaka kuondoka na kujiunga na washika mitutu hao wa London.

“Arsenal wanajiandaa kuweka ofa mpya kwa ajili ya Bruno Guimaraes. Mchezaji tayari amekubaliana nao maslahi binafsi. Ingawa Newcastle wamekuwa wakisisitiza hawataki kumuuza, Arsenal wanaamini kuwa ofa ya milioni 70 itawafanya wawe katika nafasi nzuri ya mazungumzo,” alisema Romano.

Newcastle yajipanga na Aladji Bamba

Tumaini la Arsenal kupata saini ya Bruno linaongezeka baada ya taarifa kuthibitisha kuwa Newcastle wamekubaliana na Monaco kumsajili Aladji Bamba. Mchezaji huyo tayari yupo nchini Uingereza kwa ajili ya kufanyiwa vipimo vya afya na kukamilisha taratibu za uhamisho wake.

Bamba anatajwa kuwa ni mchezaji anayekwenda kuziba pengo la Bruno, jambo linaloifanya Newcastle kuwa na utulivu zaidi katika kufanya maamuzi kuhusu mustakabali wa nahodha wao huyo wa Brazil.

Arsenal hawataki kupoteza fedha

Licha ya kutamani sana huduma ya Guimaraes, Arsenal wameonyesha msimamo wao wa kutotaka kulipa bei ya kupita kiasi. Uongozi wa klabu umedhamiria kutotumia fedha nyingi kupita kiasi katika soko hili la usajili, wakitumia busara kama walivyofanya awali kwenye dili nyinginezo.

Kwa sasa, mashabiki wa Arsenal wanasubiri kuona kama dili hili litafikia tamati, huku vyanzo mbalimbali vikieleza kuwa Bruno atapata nafasi ya kutimiza ndoto yake ya kujiunga na kikosi cha Mikel Arteta kabla ya dirisha la usajili kufungwa.