Arsenal yajuta kumpoteza Morgan Rogers kwa Chelsea

Kushindwa kwa Arsenal sokoni

Klabu ya Arsenal inajikuta katika wakati mgumu baada ya kushindwa kumpata mshambuliaji chipukizi, Morgan Rogers, ambaye alikuwa mmoja wa walengwa wao wakuu katika dirisha hili la usajili. Hali hiyo imezua mjadala mkubwa, huku wadau wa soka wakishangazwa na hatua ya klabu hiyo kusita kuwekeza fedha za kutosha.

Kocha Mikel Arteta alikuwa na mazungumzo ya moja kwa moja na mchezaji huyo wa Aston Villa kwa miezi kadhaa. Hata hivyo, Arsenal walikuwa wakijaribu kupunguza gharama, wakipanga kuweka dau la takriban pauni milioni 90 hadi 100, jambo ambalo lilitoa mwanya kwa Chelsea kuingilia kati.

Mchambuzi aishangaa Arsenal

Aliyekuwa skauti wa Ligi Kuu ya Uingereza, Bryan King, amekuwa mkali dhidi ya Arsenal kwa kile alichokiita “kupoteza muda” kwa mchezaji ambaye walikuwa wamemfuatilia kwa karibu. King anaamini kuwa kusita kwa Gunners ndiko kulikopelekea Chelsea kunyakua saini hiyo.

“Namaanisha, nilidhani Arsenal walikuwa wanapiga kelele nyingi kuhusu kumsajili huyu mchezaji, sasa kwa nini hawakwenda tu na kumaliza kazi wakati unazungumzia kiasi hicho cha pesa? Wamelipa pauni milioni 100 kwa Declan Rice, kwa hiyo milioni 17 zaidi isingekuwa na tofauti kubwa kwa ubora atakaouleta,” alisema King kupitia Football Insider.

King aliongeza kuwa katika soka, kusita mara nyingi huleta madhara makubwa, na katika tukio hili, Chelsea walikuwa wepesi kufanya maamuzi magumu na kufanikisha dili hilo haraka.

Chelsea wavamia na kumaliza dili

Taarifa za uhakika zinaeleza kuwa Chelsea waliamua kuingia sokoni kwa kishindo kwa kutoa dau la pauni milioni 117. Hatua hii ilikuja kama mshangao mkubwa kwa Arsenal ambao hawakudhani kuwa klabu hiyo ya Stamford Bridge ingeweza kujitosa kwa kasi hiyo.

Fabrizio Romano amebainisha kuwa Chelsea walifanya kazi kwa siri na kumaliza dili hilo ndani ya saa 24 ili kuhakikisha Arsenal haina nafasi ya kurudi na ofa nyingine. Hii inamfanya Rogers kuungana na rafiki yake wa muda mrefu, Cole Palmer, katika kikosi cha Chelsea.

Kwa upande wa Arsenal, tukio hili linawalazimu sasa kurudi sokoni kutafuta mbadala wa haraka kabla ya dirisha kufungwa, huku presha ikizidi kumpanda Mikel Arteta ambaye alikuwa amejipanga kumtumia Rogers kuimarisha safu yake ya ushambuliaji.