Arsenal yajipanga: Kenan Yildiz kipaumbele, Eli Junior Kroupi kuwa mbadala Januari

Arsenal inahaha kusaka winga mpya

Baada ya kufanikiwa kuimarisha safu yake ya ulinzi na kiungo katika dirisha hili la usajili, Arsenal sasa inaelekeza nguvu zake katika kuimarisha safu ya mbele. Kocha Mikel Arteta bado hajaridhika na chaguzi alizonazo upande wa kushoto wa uwanja, na sasa amemweka nyota wa Juventus, Kenan Yildiz, kuwa mlengwa wake mkuu.

Yildiz, mwenye umri wa miaka 21, amekuwa na kiwango bora sana nchini Italia baada ya kufikisha mabao na asisti zenye tarakimu mbili msimu uliopita. Arteta anaonekana kuvutiwa sana na uwezo wa mshambuliaji huyo wa Uturuki na anataka kumpata kabla ya dirisha hili la usajili kufungwa.

Changamoto za Juventus na Gabriel Martinelli

Licha ya shauku ya Arsenal, Juventus imekuwa ikisisitiza kuwa Yildiz hauzwi. Hata hivyo, kuna tetesi zinazodai kuwa Juventus inaweza kubadili msimamo wake endapo Arsenal italeta ofa nono, au huenda wakashawishika kumuachia ikiwa Gabriel Martinelli atajumuishwa kwenye dili hilo kama sehemu ya mabadilishano.

Arsenal imekuwa ikikabiliana na changamoto kubwa katika kusaka washambuliaji msimu huu. Majina makubwa kama Julian Alvarez yameshindikana, huku wachezaji wengine waliokuwa wakisakwa kama Morgan Rogers, Yan Diomande, na Bradley Barcola wakiishia kujiunga na timu nyingine au kuchagua vipaumbele vingine.

Eli Junior Kroupi: Mpango wa Januari

Kama dili la Yildiz litashindikana kukamilika ndani ya muda huu mfupi, Arsenal tayari imeshaandaa mpango mbadala. Ripoti kutoka The Independent zinaeleza kuwa klabu hiyo itasubiri hadi dirisha dogo la Januari ili kumnyakua Eli Junior Kroupi kutoka Bournemouth.

Kroupi, kijana wa miaka 20, aling’ara sana katika msimu wake wa kwanza kwenye Ligi Kuu ya England (Premier League) msimu uliopita, akifunga mabao 13 yaliyosaidia Bournemouth kufuzu kucheza michuano ya Europa League. Hata hivyo, kwa sasa yupo nje ya uwanja akipata nafuu ya upasuaji wa mguu alioufanyiwa wakati wa maandalizi ya msimu.

“Arsenal inafuatilia kwa karibu hali ya afya ya Kroupi na iko tayari kuingia vitani kumsajili pindi tu atakaporejea uwanjani na kuwa fiti kikamilifu, huku Bournemouth ikikadiriwa kumtathmini nyota huyo kwa kiasi cha pauni milioni 85,” imeeleza taarifa hiyo.

Kwa sasa, mashabiki wa ‘The Gunners’ wanasubiri kuona kama uongozi utafanikiwa kumpata Yildiz kabla ya saa za mwisho za dirisha hili au kama watalazimika kusubiri hadi Januari kumnasa staa huyo wa Bournemouth.