Arsenal yapewa nafasi ya kumsajili Julian Alvarez

Arsenal wapewa kipaumbele kumsajili Alvarez

Klabu ya Arsenal imepata mwanga mpya katika jitihada zao za kuimarisha safu ya ushambuliaji baada ya kupata nafasi ya kipaumbele kumsajili straika wa Atletico Madrid, Julian Alvarez. Klabu hiyo ya La Liga imeweka wazi kuwa haiko tayari kumuuza mchezaji huyo kwa wapinzani wao wa ndani, Barcelona, jambo linaloifanya Arsenal na Paris Saint-Germain kuwa na nafasi kubwa zaidi ya kumsajili.

Arsenal, ambao wametoka kushinda ubingwa wa Premier League kwa mara ya kwanza baada ya miaka 22, hawana mpango wa kutulia na wanataka kuongeza nguvu kikosini ili kuendeleza ubabe wao. Julian Alvarez amekuwa akitajwa kuwa chaguo muhimu la kuisaidia timu hiyo, hasa ili kupunguza mzigo wa mabao kwa Viktor Gyokeres aliyesajiliwa msimu uliopita kutoka Sporting CP.

Mvutano wa ‘usaliti’ kati ya Alvarez na Atletico

Hali ya mambo kati ya Julian Alvarez na uongozi wa Atletico Madrid inaonekana kuwa na mvutano mkubwa. Mtaalamu wa masuala ya usajili, Fabrizio Romano, amebainisha kuwa mchezaji huyo anajihisi ‘amesalitiwa’ na klabu yake ya sasa kutokana na kukwamisha ndoto yake ya kutaka kujiunga na Barcelona.

“Alvarez anajihisi amesalitiwa na Atletico Madrid, na Atletico nao wanajihisi wamesalitiwa na Julian. Ni hali ya ajabu na yenye taharuki kubwa. Msimamo wa mchezaji ni dhahiri, amewaambia uongozi na Diego Simeone kuwa anataka kuondoka,” alisema Romano kupitia chaneli yake ya YouTube.

Rekodi mpya ya usajili?

Atletico Madrid inaripotiwa kuhitaji kiasi cha Euro milioni 150 (pauni milioni 129) ili kumruhusu mshambuliaji huyo kuondoka. Ikiwa dili hili litakamilika kwa kiasi hicho, basi litavunja rekodi ya Arsenal ya kumsajili Declan Rice iliyogharimu pauni milioni 105 na kuwa usajili ghali zaidi katika historia ya klabu hiyo.

Kwa upande wa Atletico, wamebainisha kuwa hawana nia ya kumuuza mchezaji huyo, lakini wapo tayari kusikiliza ofa kutoka kwa vilabu vingine kama Arsenal na PSG badala ya Barcelona. Wanahisi kuwa Barcelona wamekuwa wakimshawishi mchezaji huyo kwa siri ili kuilazimisha klabu kumuuza, jambo ambalo limefanya mahusiano kati ya timu hizo mbili za Uhispania kuwa mabaya zaidi.

Kwa sasa, mashabiki wa Arsenal watalazimika kuwa na subira kwani Romano amesisitiza kuwa huu utakuwa mchakato mrefu na wa kuvutia, na hakuna makubaliano yanayotarajiwa kukamilika kwa haraka katika kipindi hiki.