Arsenal yafikia mwafaka na Illan Meslier, Morgan Rogers karibu kutua Emirates

Usajili wa kwanza wa Arsenal kukamilika

Klabu ya Arsenal imefanikiwa kuingia mkataba na mlinda mlango Illan Meslier, ambaye alikuwa mchezaji huru baada ya kuachwa na Leeds United mwishoni mwa msimu uliopita. Mtaalamu wa masuala ya usajili, Fabrizio Romano, amethibitisha kukamilika kwa dili hilo kwa kutoa kauli yake maarufu ya “here we go”.

Meslier, ambaye hakupata nafasi ya kucheza msimu uliopita akiwa na Leeds, amefanyiwa vipimo vya afya jijini London na kusaini mkataba wake wa kujiunga na kikosi cha Mikel Arteta. Usajili huu unakuja wakati ambapo hatima ya mlinda mlango wa sasa, Kepa Arrizabalaga, ikiwa bado haijajulikana kutokana na uvumi wa uwezekano wa yeye kuondoka klabuni hapo.

Akizungumzia hali ya Kepa, Romano alisema:

“Kuna uwezekano wa Kepa kuondoka katika dirisha hili la usajili, yote inategemea ofa zitakazokuja. Tutaona kama ataamua kubaki ili kupambana namba na David Raya au atatafuta changamoto mpya kwengine.”

Morgan Rogers ndiye kipaumbele cha Arteta

Sambamba na usajili wa Meslier, Arsenal inaendelea na mikakati ya kuimarisha eneo la ushambuliaji. Ripoti zinaeleza kuwa klabu hiyo imemweka Morgan Rogers wa Aston Villa kama lengo lao kuu katika dirisha hili la usajili.

Inaelezwa kuwa mazungumzo baina ya pande hizo mbili yako katika hatua nzuri. Ingawa Aston Villa wanatajwa kuhitaji kiasi kikubwa cha pesa kinachofikia Euro milioni 130, Arsenal wanaamini kuwa makubaliano yanaweza kufikiwa kupitia mazungumzo ya ana kwa ana kati ya klabu hizo mbili.

Mustakabali wa Leandro Trossard

Wakati Arsenal ikijikita kumsajili Rogers, mshambuliaji Leandro Trossard anahusishwa na uwezekano wa kujiunga na klabu ya Beşiktaş ya Uturuki. Klabu hizo mbili zinaripotiwa kufikia makubaliano ya ada ya uhamisho, lakini uamuzi wa mwisho bado uko mikononi mwa mchezaji mwenyewe.

Romano amesisitiza kuwa, hata kama Trossard ataondoka au kubaki, Arsenal wamejipanga kusajili winga mwingine bora ili kuongeza makali kwenye kikosi chao kwa ajili ya changamoto za msimu ujao.