Mikel Arteta amfagilia Nico Williams kuliko Vinicius Junior

Arteta anahitaji winga mpya

Kocha wa Arsenal, Mikel Arteta, anaonekana kuwa na mwelekeo tofauti katika kusuka upya safu yake ya ushambuliaji msimu huu. Pamoja na majina makubwa kuhusishwa na klabu hiyo ya London, ripoti kutoka nchini Hispania zinaeleza kuwa Arteta anampendelea zaidi mshambuliaji wa Athletic Bilbao, Nico Williams, kuliko nyota wa Real Madrid, Vinicius Junior.

Baada ya kufanya vizuri msimu uliopita kwa kutwaa ubingwa wa Ligi Kuu ya England na kufika fainali ya Ligi ya Mabingwa Ulaya, Arsenal sasa ina nguvu kubwa ya kiuchumi ya kuvutia wachezaji wakubwa. Hata hivyo, Arteta anaonekana kuwa na kigezo maalum anachokizingatia kabla ya kufanya uamuzi wa mwisho.

Kwa nini Nico Williams?

Ripoti zinaeleza kuwa Arteta anamtambua Vinicius Junior kama mchezaji mwenye kipaji cha hali ya juu anayeweza kuleta madhara makubwa, lakini kuna jambo moja linalomfanya awe na wasiwasi: mchango wake wa kukaba (defensive contribution).

Kwa mfumo wa soka wa Arteta, nidhamu ya ulinzi ni muhimu sana kwa kila mchezaji, ikiwemo wale wa pembeni. Hapa ndipo Nico Williams anapoonekana kupata nafasi mbele ya nyota huyo wa Brazil. Mhispania huyo anaonekana kuendana vyema na falsafa ya kocha huyo ya kusaidia timu wakati wa kupoteza mpira, jambo ambalo linaonekana kuwa kipaumbele cha juu kwa Arteta.

Zaidi ya hayo, ripoti zinasema kuwa:

“Arteta anaamini kuwa Nico Williams anaweza kuwa chaguo sahihi kwa Arsenal. Ikiwa ataepukana na majeraha, anaweza kuwa mchezaji muhimu sana. Vilevile, gharama zake ni nafuu zaidi ukilinganisha na Vinicius.”

Vinicius Junior kubaki Bernabeu

Ndoto za mashabiki wa Arsenal kumuona Vinicius Junior akitua Emirates huenda zikabaki kuwa ndoto tu. Ripoti za hivi karibuni kutoka Sky Sports zinaeleza kuwa Real Madrid haina nia yoyote ya kumuuza mshambuliaji huyo. Badala yake, klabu hiyo inajipanga kumuongezea mkataba mpya wa muda mrefu ili aendelee kuwa mmoja wa ‘Galacticos’ chini ya kocha mpya, Jose Mourinho.

Hatima ya Nico Williams

Kwa upande wa Nico Williams, inasemekana kuwa mchezaji huyo tayari ameshaonyesha nia ya kutaka changamoto mpya nje ya Athletic Bilbao na amewasiliana na mawakala wake kufanya mazungumzo na klabu kubwa kama Arsenal, Chelsea, na Barcelona.

Hata hivyo, wakala wake, Félix Tainta, amewataka wadau kuwa watulivu. Akizungumza na Radioestadio Noche, Tainta alisema:

“Kwa sasa, tunahitaji kuwa watulivu. Acheni afurahie muda wake na aachane kidogo na mambo ya soka. Kile kinachotakiwa kutokea, kitatokea tu. Tuwe watulivu na wapole.”

Arsenal inaendelea kufuatilia hali hiyo kwa karibu huku dirisha la usajili likiendelea kupamba moto.