Arteta atoa onyo kwa kinda Max Dowman huku Eze akipata presha Arsenal

Onyo kwa Chipukizi Max Dowman

Wakati Arsenal ikifurahia kuanza msimu wa 2026/27 kwa kasi kubwa na ushindi katika mashindano yote, kocha Mikel Arteta amemtumia ujumbe mzito chipukizi wao, Max Dowman. Kijana huyo anatarajiwa kupata nafasi katika kikosi kitakachocheza dhidi ya Ipswich Town kwenye mchezo wa Kombe la Carabao.

Licha ya kuaminiwa kupewa dakika hizo, Arteta ameweka wazi kuwa kijana huyo hana ‘tiketi ya bure’ ya kucheza. Akizungumza na waandishi wa habari, kocha huyo alisisitiza kuwa vipaji vinapaswa kupigania nafasi zao kwa jasho.

“Max atapata nafasi yake. Atapata dakika zake, lakini atalazimika kuzipigania kama mchezaji yeyote yule. Tunajua kipaji alichonacho, na tunahitaji kumsaidia ili aendelee kukua katika njia sahihi,” alisema Arteta.

Mashaka juu ya Eberechi Eze

Wakati Dowman akijaribu kutafuta nafasi, hali inaonekana kuwa ngumu kwa staa Eberechi Eze, aliyeigharimu Arsenal kiasi cha paundi milioni 60. Ripoti kutoka ndani ya klabu zinaeleza kuwa kuna ‘mashaka makubwa’ kuhusu namna kiungo huyo mshambuliaji anavyocheza tangu atue klabuni hapo.

Aliyekuwa skauti wa Ligi Kuu ya England, Mick Brown, ametoa mtazamo wake kuhusu kwanini Arteta amekuwa akimwacha Eze kwenye benchi mara nyingi msimu huu.

“Eberechi Eze anaanza kuwa tatizo kubwa kwa Arsenal. Sio siri kwamba hatuoni yule mchezaji tuliyemzoea akiwa Crystal Palace, lakini kuna sababu za msingi na sio lazima iwe kosa lake,” alieleza Brown.

Kwa nini Eze anapata shida?

Uchambuzi wa Brown unaonyesha kuwa mfumo wa mchezo wa Arsenal ndio unaomkwamisha Eze. Akiwa Palace, Eze alikuwa huru kucheza eneo la mwisho la uwanja na kufanya maajabu yake. Hata hivyo, katika mfumo wa Arteta, anachezeshwa pembeni (winga), nafasi ambayo Brown anaamini haimsaidii kuonyesha ubora wake.

“Arsenal wanacheza kwa tahadhari kubwa na wanazingatia umiliki wa mpira, kitu ambacho hakimruhusu Eze kufanya yale mambo yake ya kishirikina uwanjani. Huku anapaswa kurudi nyuma kusaidia ulinzi na kutunza umiliki wa mpira, jambo ambalo ni tofauti kabisa na uhuru aliopewa zamani,” aliongeza Brown.

Kwa sasa, inaonekana Arteta anapendelea chaguzi nyingine katika kikosi chake, huku mustakabali wa Eze ukiwa mikononi mwa kocha huyo ambaye anahitaji kuona mchezaji huyo anaendana na falsafa yake ya soka la kuzuia hatari.