Aston Villa wameweka ofa mezani kwa Amad Diallo, Zirkzee naye anaelekea kutimka Man Utd

Aston Villa wamnyemelea Amad Diallo

Kuelekea kufungwa kwa dirisha la usajili, klabu ya Aston Villa imeripotiwa kuweka mezani ofa rasmi kwa ajili ya kumsajili winga wa Manchester United, Amad Diallo. Taarifa kutoka nchini Ivory Coast, kupitia mtandao wa 225 Foot, zimeeleza kuwa Villa wanahitaji kuimarisha safu yao ya ushambuliaji na wanaamini Diallo ndiye mtu sahihi wa kuleta mageuzi kwenye kikosi chao.

Hata hivyo, dili hili linaonekana kuwa na changamoto nyingi. Diallo ana mkataba na Manchester United hadi mwaka 2030 na bado ana ndoto ya kufanya vizuri na klabu hiyo, hasa msimu huu ambapo United wanashiriki michuano ya Ligi ya Mabingwa Ulaya (Champions League). Mchezaji mwenyewe bado anaonekana kuwa na nia ya kubaki Old Trafford kupambania namba chini ya kocha Michael Carrick.

Joshua Zirkzee karibu kutua Fiorentina

Wakati hali ya Diallo ikiwa bado ni tete, mambo yanaonekana kuwa wazi zaidi kwa mshambuliaji Joshua Zirkzee. Mholanzi huyo anahusishwa sana na uwezekano wa kurejea nchini Italia kujiunga na Fiorentina.

Awali, Zirkzee alionekana kutaka kubaki Manchester United ili kupambania nafasi yake licha ya kupata changamoto ya kupata dakika nyingi za kucheza. Hata hivyo, ripoti ya mwandishi wa Manchester Evening News, Tyrone Marshall, inaeleza kuwa mchezaji huyo amebadili msimamo wake.

“Joshua Zirkzee alikuwa tayari kuondoka mwezi Januari, lakini alibadili uamuzi mwanzoni mwa majira haya ya joto na alikuwa ameridhika kubaki kupambana kwa ajili ya nafasi yake. Hata hivyo, kutokana na dakika chache za kucheza, Fiorentina sasa wanaongoza mbio za kumsajili,” ilieleza ripoti hiyo.

Inatarajiwa kuwa dili la Zirkzee kwenda Fiorentina litakuwa ni la mkopo, lakini likiwa na kipengele cha kumlazimisha mchezaji huyo kununuliwa moja kwa moja (obligation to buy) pindi muda wa mkopo utakapomalizika.

Manchester United wamekuwa na shughuli pevu katika dirisha hili la usajili, wakiwa wameshatumia takriban pauni milioni 150 kufanya marekebisho kwenye kikosi chao. Pamoja na hayo, kocha Michael Carrick bado anaendelea kupanga safu yake kabla ya dirisha kufungwa rasmi wiki ijayo, huku wachezaji kadhaa wakitarajiwa kuondoka ili kusawazisha bajeti ya klabu.