Atletico Madrid yakanusha taarifa za uongo kuhusu Julian Alvarez, Arsenal yapewa matumaini

Mvutano wa Julian Alvarez na Atletico Madrid waendelea

Klabu ya Atletico Madrid imeeleza kukerwa sana na kile walichokitaja kama “kampeni ya uongo na nusu ukweli” inayozunguka mustakabali wa mshambuliaji wao, Julian Alvarez. Tangu mchezaji huyo mwenye umri wa miaka 26 aonyeshe nia yake ya kutaka kuondoka klabuni hapo mwishoni mwa mwezi Juni, kumekuwa na sintofahamu kubwa ambayo imekuwa ikichukua vichwa vya habari katika dirisha hili la usajili.

Hali hiyo ilionekana dhahiri mwishoni mwa wiki iliyopita wakati mashabiki wa Atletico walipomzomea Alvarez alipoingia uwanjani kama mchezaji wa akiba katika mchezo ambao timu hiyo ilitoka sare ya 2-2 dhidi ya Villarreal.

Atletico yajiona kama mhanga

Kwa mujibu wa vyanzo vya ndani kutoka klabu hiyo ya jijini Madrid, wameeleza kuwa wao ndio waathirika wakubwa katika sakata hili zima. Kupitia gazeti la Marca, klabu hiyo imetoa msimamo wake:

“Mchezaji anajifanya kuwa mhanga, lakini mhanga pekee katika kesi ya Julian ni sisi. Wametuumiza kiuchumi na kijamii. Hali hii sio kuhusu pesa, ni kuhusu heshima. Kampeni imetengenezwa yenye uongo mwingi na nusu ukweli. Mtu pekee anayeumia hapa ni Atletico.”

Kutokana na hali hiyo, Atletico imeweka msimamo mkali kuwa hakuna nafasi ya kumuuza mshambuliaji huyo kwenda kwa wapinzani wao wa La Liga, Barcelona, wakisisitiza kuwa ni suala la heshima.

Arsenal yajipanga kunasa saini ya Muargentina huyu

Katika hali isiyotarajiwa, ripoti zinadai kuwa Arsenal wana nafasi kubwa ya kumsajili Alvarez. Inasemekana klabu hiyo ya London iko tayari kuvunja rekodi ya usajili ya England ili kumpata nyota huyo wa Argentina, ambaye amekuwa na kiwango bora kwa kufunga mabao 49 na kutoa pasi 17 za mabao katika michezo 107 ndani ya misimu miwili iliyopita.

Kwa upande mwingine, rais wa Barcelona, Joan Laporta, amekiri kuwa bado wana nia ya kumsajili Alvarez lakini wamekubali kufuata utaratibu na kuheshimu msimamo wa Atletico.

“Tuna nia kubwa ya kumsajili Julian Álvarez. Tunataka waukubali ofa yetu kwa heshima kubwa kwa Atletico Madrid. Tumewasiliana nao klabu kwa klabu, lakini wameeleza kuwa hawana nia ya kumuuza kwa sasa kwa kuwa hawana mbadala wake,” alisema Laporta.

Alvarez alijiunga na Atletico akitokea Manchester City mwaka 2024 kwa mkataba wa miaka sita. Hata hivyo, kutokana na hali ilivyo sasa, inaonekana ni vigumu kwa mshambuliaji huyo kuumaliza mkataba wake ndani ya klabu hiyo.