Atletico Madrid wavamia dili la Cristian Romero huku Inter Milan wakipata changamoto

Vita ya kuwania saini ya Cristian Romero inashika kasi

Mustakabali wa beki kisiki wa Tottenham Hotspur, Cristian Romero, unaendelea kuwa gumzo kubwa katika dirisha hili la usajili huku klabu mbalimbali kubwa barani Ulaya zikionyesha nia ya kunasa huduma yake.

Awali, Inter Milan ndio walionekana kuwa mstari wa mbele kumshawishi beki huyu kurejea nchini Italia, lakini sasa Atletico Madrid wameibuka na kuanza kufuatilia kwa karibu hali ya mchezaji huyo, jambo linalotishia kuharibu mipango ya Inter.

Changamoto ya kifedha inayokwamisha dili

Licha ya Inter Milan kuonekana kuwa na nia ya dhati, mazungumzo yameelezwa kuwa magumu kutokana na hali ya kifedha. Tottenham Hotspur wameweka wazi wanataka kiasi cha Euro milioni 50 ili kumwachia beki huyo, huku Inter wakianza mazungumzo na ofa ya Euro milioni 40, ikiwa ni mfumo wa mkopo wenye kipengele cha usajili wa kudumu.

Sio ada ya uhamisho pekee inayoleta shida, bali pia mshahara wa mchezaji mwenyewe. Inafahamika kuwa Romero anahitaji mshahara wa Euro milioni 6.5 kwa msimu, wakati Inter wamejipanga kutoa kiasi kisichozidi Euro milioni 5. Hizi tofauti za kifedha ndizo zinazompa nafasi Atletico Madrid kuingilia kati ili kuona kama wanaweza kukidhi matakwa ya klabu na mchezaji.

Msimamo wa Tottenham na De Zerbi

Tottenham kwa upande wao wako tayari kusikiliza ofa nzuri kwa mlinzi huyo ambaye amekuwa na hamu ya kuondoka kwa muda sasa. Kocha wa klabu hiyo, Roberto De Zerbi, ameweka wazi kuwa hatatumia nguvu kumbakiza mchezaji asiyekuwa na furaha katika klabu hiyo.

“Romero kama mchezaji ni mmoja wa mabeki bora duniani, lakini mwisho wa siku nimesema nataka kuheshimu matakwa ya wachezaji wangu,” alisema De Zerbi.

Kauli hii ya kocha inaonyesha dhahiri kuwa mlango wa kuondoka kwa Romero uko wazi, huku kukiwa pia na taarifa za kipa Guglielmo Vicario kuhusishwa na kurejea Serie A, kukiwa na timu kama Juventus na Napoli zikimnyemelea.

Kwa sasa, mashabiki wa Spurs wanasubiri kuona ni wapi mlinzi huyu mahiri atatua, huku Atletico Madrid wakionekana tayari kufanya jaribio la mwisho kumpoka mbele ya Inter Milan.