Aurelien Tchouameni aikataa Manchester United, aongeza mkataba Real Madrid

Mpango wa Manchester United kugonga mwamba

Matumaini ya Manchester United kumnasa kiungo hatari wa Ufaransa, Aurelien Tchouameni, yamepotea rasmi baada ya mchezaji huyo kufikia makubaliano ya kuongeza mkataba wake na Real Madrid.

Ripoti kutoka kwa vyanzo mbalimbali vya kuaminika zimebainisha kuwa, licha ya United kuonyesha nia kubwa ya kumtaka kiungo huyo ili kuziba pengo lililoachwa na Casemiro, Tchouameni ameamua kuendelea kusalia katika dimba la Santiago Bernabeu hadi mwaka 2031.

Uamuzi wa Tchouameni na mkataba mpya

Taarifa kutoka nchini Ufaransa kupitia RMC Sport zinasema kuwa, baada ya kurudi mazoezini na timu yake ya taifa inayoshiriki Kombe la Dunia 2026, Tchouameni amekubaliana na uongozi wa ‘Los Blancos’ kuongeza mkataba wake.

Mtaalamu wa masuala ya usajili, Fabrizio Romano, amethibitisha hilo kupitia mtandao wa X kwa kusema:

“Aurelien Tchouameni kusaini mkataba mpya Real Madrid hivi karibuni, kila kitu kimekubaliwa hadi Juni 2031. Mpango wa Manchester United haukuwa karibu kufanikiwa kutokana na mshahara mkubwa na Real Madrid kutokuwa tayari kumuuza.”

Inaelezwa kuwa kocha Jose Mourinho amekuwa na mchango mkubwa katika kufanikisha mazungumzo hayo ya haraka. Kwa mkataba huu mpya, Tchouameni anatarajiwa kuvuna kitita cha Euro milioni 13 kwa mwaka, jambo linalomfanya kuwa mmoja wa wachezaji wanaolipwa vizuri zaidi klabuni hapo.

United kugeukia maeneo mengine

Licha ya kukosa saini ya Tchouameni, Manchester United haijapoteza matumaini katika kuimarisha safu yake ya kiungo chini ya kocha Michael Carrick. Taarifa njema kwa mashabiki wa ‘Mashetani Wekundu’ ni kukamilika kwa dili la kiungo Andrey Santos kutoka Chelsea.

United imefikia makubaliano ya pauni milioni 50 kwa ajili ya Santos. Mchezaji huyo anatarajiwa kufanyiwa vipimo vya afya na kusaini mkataba wa miaka mitano, ikiwa na chaguo la kuongeza mwaka mmoja zaidi. Chelsea pia imeingiza kipengele cha asilimia 10 ya mauzo ya baadaye ya kiungo huyo katika makubaliano hayo.

Hivyo, wakati Tchouameni akichagua kubaki Hispania, United inaendelea na ujenzi wa kikosi chake kwa ajili ya changamoto za Ligi Kuu ya England na UEFA Champions League msimu ujao.