Bayern Munich yafunga mlango kwa Aston Villa kuhusu Joao Palhinha

Mvutano wa usajili wa Palhinha

Ndoto ya Aston Villa kumsajili kiungo wa Bayern Munich, Joao Palhinha, inaelekea kuota mbawa baada ya uongozi wa klabu hiyo ya Ujerumani kuweka wazi kuwa hawapo tayari kukubali masharti yanayotaka kulazimishwa na klabu hiyo ya Ligi Kuu ya England.

Aston Villa walikuwa wakimfanya Palhinha kuwa chaguo lao la kwanza kuimarisha safu ya kiungo, kufuatia changamoto za majeruhi walizopata msimu uliopita na kuondoka kwa Youri Tielemans. Hata hivyo, mazungumzo kati ya pande hizo mbili yamegonga mwamba.

Msimamo mkali wa Max Eberl

Ofisa wa michezo wa Bayern Munich, Max Eberl, alizungumza kwa uwazi katika mkutano na waandishi wa habari na kueleza kuwa hakuna makubaliano yatakayofikiwa na Aston Villa. Alisisitiza kuwa Bayern haitakubali kupangiwa masharti na klabu yoyote.

“Tulisoma ripoti kwamba Aston Villa wamewasiliana nasi kuhusu João, na hilo ni kweli. Lakini hatutaweza kufikia makubaliano na Aston Villa. Haiwezekani kwa sababu hatupo katika nafasi ya kufanya kila kitu ambacho wengine wanajaribu kutulazimisha,” alisema Eberl.

Eberl aliongeza kuwa katika usajili wa aina hii, pande zote tatu (klabu mbili na mchezaji) lazima zikubaliane, na kwa sasa, hali hiyo haijafikiwa kati yao na Villa.

Newcastle United yaingilia kati

Wakati mlango ukifungwa kwa Aston Villa, klabu ya Newcastle United inaonekana kuwa katika nafasi nzuri ya kumsajili kiungo huyo raia wa Ureno. Taarifa zinaeleza kuwa Newcastle wameingia kwa kasi na ofa ya mkataba wa miaka mitatu kwa mchezaji huyo.

Ingawa awali Palhinha alionekana kuvutiwa zaidi na wazo la kujiunga na Aston Villa, hali imebadilika baada ya mazungumzo yao na Bayern kutokwenda vizuri. Bayern Munich wamekuwa wakisisitiza wanataka uuzaji wa moja kwa moja na si ofa za mkopo zenye vipengele vya kununua baadaye, jambo ambalo limekuwa likiwaletea changamoto wanaotaka kumsajili.

Kwa sasa, Newcastle wanatazamwa kama kinara wa mbio hizo, wakitegemea uwezo wao wa kukidhi mahitaji ya Bayern ili kukamilisha usajili wa staa huyo kabla ya dirisha la usajili kufungwa.