Bayern Munich wamuweka Erling Haaland kwenye rada zao kama mrithi wa Harry Kane

Bayern Munich wajipanga kwa baadae

Klabu ya Bayern Munich inaripotiwa kuanza kuweka mikakati ya kuhakikisha inabaki kuwa na safu imara ya ushambuliaji kwa miaka ijayo. Taarifa za hivi karibuni zinaeleza kuwa miamba hiyo ya Ujerumani inamnyemelea mshambuliaji matata wa Manchester City, Erling Haaland, kama chaguo lao kuu la kumrithi Harry Kane.

Ingawa Harry Kane bado ni nguzo muhimu ndani ya Allianz Arena, uongozi wa Bayern tayari unafanya tathmini ya kina kuhusu nani atashika mikoba ya staa huyo wa Uingereza pale muda wake utakapofika. Mpango huu unaonekana kuwa sehemu ya maandalizi ya muda mrefu ya klabu hiyo ili wasipitwe na wakati.

Hali ya Haaland na Manchester City

Erling Haaland amekuwa na kiwango cha ajabu tangu atue Manchester City mwaka 2022 akitokea Borussia Dortmund. Hadi sasa, amefunga mabao 169 katika michezo 205, huku akionyesha kuwa hajachoka kufumania nyavu. Hata hivyo, tetesi zimeanza kuzagaa kuwa staa huyo anaweza kutafuta changamoto mpya kutokana na mabadiliko ya benchi la ufundi Manchester City baada ya kuondoka kwa Pep Guardiola, pamoja na klabu hiyo kukosa mataji makubwa katika misimu miwili iliyopita.

Licha ya vilabu kama Barcelona na Real Madrid kuhusishwa na nyota huyo, Bayern Munich wameamua kuingia kwenye kinyang’anyiro hicho ili wasikose nafasi ya kumsajili iwapo fursa itajitokeza.

Hatima ya Harry Kane

Kwa upande wa Harry Kane, klabu ya Bayern Munich bado inaendelea na mazungumzo ya kumuongezea mkataba mpya wa muda mrefu. Lengo la Wababaria hao ni kuhakikisha Kane anabaki Munich kwa angalau miaka mingine miwili zaidi.

Kulikuwa na tetesi za Kane huenda akarejea Ligi Kuu ya Uingereza (Premier League) na kujiunga na Manchester United, lakini mwandishi wa habari za michezo, Pete O’Rourke, amefafanua kuwa hakuna dalili za mshambuliaji huyo kutaka kuondoka Ujerumani kwa sasa.

“Inaonekana hakuna ishara yoyote kwa sasa kuwa Kane anatafuta njia ya kuondoka. Anaonekana kuwa mwenye furaha ndani ya Bayern Munich, na klabu inampa kila kitu anachohitaji kwa sasa,” alisema O’Rourke.

Ingawa mazungumzo ya mkataba mpya yamekuwa na changamoto kidogo kutokana na Kane kuhitaji kipengele cha kuondoka (release clause) kwenye mkataba wake, pande zote mbili bado zinaonekana kuwa na nia ya kufikia muafaka hivi karibuni.