Bournemouth wamtolea uvivu Manchester United kuhusu Alex Scott

Msimamo wa Bournemouth uko wazi

Manchester United wameingia kwenye kikaango baada ya Bournemouth kuweka wazi msimamo wao kuhusiana na kiungo nyota, Alex Scott. Licha ya mashetani wekundu hao kufanya mawasiliano ya moja kwa moja ili kujaribu kumnasa kiungo huyo, klabu yake imesisitiza kuwa mchezaji huyo hauzwi.

Ripoti kutoka kwa waandishi nguli wa soka nchini Uingereza, Nizaar Kinsella na Ben Jacobs, zimebainisha kuwa Bournemouth wameamua kutomsikiliza yeyote anayepiga hodi kwa ajili ya Scott katika dirisha hili la usajili. Hii inakuja huku Manchester United wakionekana kuhangaika kutafuta viungo wapya baada ya kukosa malengo yao mengine kadhaa.

United wataendelea kujaribu

Ingawa Bournemouth wamekuwa wakali, inaelezwa kuwa vilabu vikubwa vikiwemo Manchester United, Arsenal, na hata Manchester City bado vina mpango wa kujaribu bahati zao. Hata hivyo, msimamo wa klabu ya Bournemouth haubadiliki.

“Bournemouth wamekuwa wazi kwa Alex Scott kwamba hawana nia ya kumuuza,” aliandika Ben Jacobs. “Wanafurahia kubaki na mchezaji huyo hata kama hatasaini mkataba mpya, kwa kuwa bado ana mkataba unaomalizika mwaka 2028.”

Chaguo la pili la Manchester United

Alex Scott anatajwa kuwa mmoja wa viungo wawili ambao Manchester United wamewaweka kwenye orodha yao ya kipaumbele, mwingine akiwa ni Aurelien Tchouameni wa Real Madrid. Hata hivyo, bei ya Scott inaonekana kupanda kila siku ambapo sasa inakadiriwa kufikia kiasi cha pauni milioni 80 kutokana na hali ya soko la sasa.

Bournemouth kwa upande wao wanajaribu kumshawishi mchezaji huyo kusaini mkataba mpya na ulioboreshwa ambao utaweka wazi kipengele cha kuruhusu kuvunjwa kwa mkataba (release clause). Hata hivyo, hata kama mazungumzo hayo yakigonga mwamba, klabu hiyo haina hofu kwani mchezaji huyo bado anafungwa na mkataba wa muda mrefu.

Kwa sasa, mashabiki wa United wanapaswa kusubiri kuona kama uongozi wa klabu hiyo utafanikiwa kuvunja ukuta wa Bournemouth au watalazimika kugeukia maeneo mengine ili kuimarisha safu yao ya kiungo.