Bruno Fernandes aziba masikio ofa za nje, ataka kuendelea kubaki Manchester United

Hatima ya Bruno Fernandes Old Trafford

Nahodha wa Manchester United, Bruno Fernandes, ameweka wazi msimamo wake wa kutaka kuendelea kuitumikia klabu hiyo licha ya kuwepo kwa taarifa za klabu mbalimbali barani Ulaya na Saudi Arabia kutaka huduma yake.

Kiungo huyo mshambuliaji, ambaye alikuwa mmoja wa wachezaji bora zaidi katika Ligi Kuu ya Uingereza msimu uliopita, ameendeleza kiwango chake bora mwanzoni mwa msimu huu, jambo linalomfanya kuwa nguzo muhimu katika kikosi cha kocha wa United.

Ofa za nje hazimtikisii

Katika kipindi cha dirisha la usajili lililopita, kulikuwa na tetesi nyingi zikimhusisha Fernandes na timu kadhaa ikiwemo Galatasaray ya Uturuki, ambayo ilikuwa tayari kumpa mshahara mara mbili ya anaolipwa sasa, pamoja na bonasi ya kusaini mkataba. Hata hivyo, inaonekana dau hilo halikumshawishi nahodha huyo kuondoka.

Klabu kubwa za Italia kama Juventus na AC Milan pia ziliripotiwa kufuatilia hali yake kwa karibu, hususan baada ya kuwepo kwa kipengele cha kuruhusu kuvunjwa kwa mkataba wake (release clause) cha takriban paundi milioni 57, ambacho kimeisha muda wake mwezi Julai.

Mazungumzo ya mkataba mpya yanatarajiwa kuanza

Ingawa mkataba wa sasa wa Fernandes unaelekea ukingoni, Manchester United wana nafasi ya kuongeza muda wa mkataba huo hadi mwaka 2028. Hata hivyo, klabu imedhamiria kumsainisha mkataba wa muda mrefu ili kumuweka mchezaji huyo kikosini kwa miaka mingi zaidi.

Ripoti kutoka kwa mwandishi wa habari za michezo, Pete O’Rourke, zinathibitisha kuwa United wapo tayari kuharakisha mazungumzo na nahodha huyo ili kumaliza kabisa uvumi wowote wa yeye kuondoka.

“Watafurahi sana kukaa naye mezani ili kujadili masharti mapya, kumpa mshahara bora zaidi na kuongeza muda wa mkataba wake ili kukomesha uvumi wowote unaoendelea kwamba anaweza kuvutiwa kuondoka Old Trafford,” O’Rourke alieleza.

Furaha ya pande zote

Taarifa za ndani zinaeleza kuwa Fernandes ana furaha kubwa kuendelea kusalia Manchester United, na klabu nayo inaridhishwa sana na mchango wake uwanjani. Hatua ya kumuongezea mkataba inatazamwa kama njia mwafaka ya kuimarisha mustakabali wa timu hiyo inayojaribu kujenga upya chini ya uongozi mpya.

Kwa mashabiki wa United, habari hizi ni faraja kubwa kwani inamaanisha kuwa kiongozi wao mkuu ataendelea kuwa kiongozi wa jahazi hilo kwa misimu ijayo.