Bruno Guimaraes yuko mbioni kutua Arsenal, Newcastle wamekubali kumuachia

Guimaraes anaelekea Emirates

Safari ya kiungo fundi kutoka Brazil, Bruno Guimaraes, kujiunga na Arsenal inaonekana kufika hatua za mwisho. Taarifa za hivi punde kutoka kwa mtaalamu wa masuala ya usajili barani Ulaya, Fabrizio Romano, zimethibitisha kuwa klabu ya Newcastle United imekubali kwa ndani kumuachia mchezaji huyo aondoke.

Arsenal, ambao msimu uliopita walitwaa ubingwa wa Ligi Kuu ya England baada ya kusubiri kwa miaka 22, wanaonekana kuwekeza nguvu kubwa katika usajili wa kiwango cha juu ili kuimarisha kikosi chao. Lengo kuu la kocha Mikel Arteta ni kupata kiungo atakayetoa sapoti kwa Martin Zubimendi na Declan Rice, ambao walionekana kuchoka katika kipindi cha mwisho cha msimu uliopita.

Newcastle wafungua milango

Kwa muda mrefu, Newcastle walikuwa wagumu kumwachia nyota huyo, lakini hali imebadilika kadiri siku zinavyosonga. Romano amebainisha kuwa pande zote mbili zimekuwa zikizungumza kwa kina kuhusu ada ya uhamisho na sasa klabu hiyo ya St. James’ Park imefungua milango.

“Newcastle wanaonekana kufungua milango kwa Bruno Guimaraes kuondoka. Hivyo, sasa klabu hizi mbili zinajadiliana kuhusu ada ya uhamisho. Kile kikwazo ambacho Newcastle walikuwa wameweka mwezi Mei, Juni na Julai, sasa kimebadilika kabisa na Arsenal wana imani kubwa,” alisema Romano.

Hatua za mwisho za usajili

Taarifa za hivi karibuni zimeeleza kuwa Guimaraes ameshafikia makubaliano binafsi na Arsenal tangu wiki kadhaa zilizopita. Kwa sasa, mchezaji huyo anasubiri tu makubaliano ya mwisho kuhusu ada ya uhamisho na maelezo mengine ili aweze kusafiri kwenda kufanya vipimo vya afya.

Newcastle inaripotiwa kuanza mchakato wa kusaka mbadala wa kiungo huyo chini ya kocha wao mpya, Jaissle. Inaelezwa kuwa Arsenal wako tayari kutoa kiasi cha pauni milioni 80, ambapo pauni milioni 70 itakuwa ada ya awali na milioni 10 zikiwa ni nyongeza kulingana na mafanikio ya mchezaji huyo klabuni hapo.

Ingawa bado mkataba haujakamilika rasmi, dalili zote zinaonyesha kuwa dili hili litakamilika muda wowote kuanzia sasa, jambo linalowapa matumaini makubwa mashabiki wa ‘The Gunners’.