Bruno Guimaraes karibu kutua Arsenal, dili laelekea ukingoni

Dili lakaribia kukamilika

Safari ya kiungo wa Newcastle United, Bruno Guimaraes kujiunga na Arsenal inaonekana kufika pazuri. Taarifa za kuaminika kutoka kwa mwandishi David Ornstein zinasema kuwa klabu hizo mbili sasa zimefikia karibu makubaliano ya jumla (total agreement) ili kukamilisha uhamisho huo mkubwa msimu huu wa dirisha la usajili.

Kwa muda mrefu, Mikel Arteta amekuwa akitafuta kiungo mwenye uwezo mkubwa wa kuleta ushindani na kuwa mbadala wa Declan Rice na Martin Zubimendi. Baada ya kuhusishwa na majina mengi, Guimaraes amejitokeza kuwa chaguo namba moja la kocha huyo wa ‘The Gunners’.

Mazungumzo yamepamba moto

Ingawa hapo awali Newcastle walikuwa wakikataa kuwepo kwa mazungumzo rasmi, sasa imethibitika kuwa pande zote mbili zimekaa meza moja na mambo yanakwenda kwa kasi. Ornstein ameweka wazi kuwa sasa kuna utayari mkubwa kwa pande zote kumaliza sakata hili ili mchezaji huyo aweze kujiunga na kikosi cha Arteta.

“Guimaraes anasubiri ruhusa tu kwa ajili ya kwenda kufanyiwa vipimo vya afya ili akamilishe safari yake kuelekea kaskazini mwa London,” ilieleza ripoti hiyo ya The Athletic.

Makubaliano ya jumla yameshafikiwa

Habari hizi zimeungwa mkono pia na mwandishi Ben Jacobs, ambaye amethibitisha kuwa kuna ‘broad agreement’ (makubaliano mapana) ambayo imeshatikiwa baina ya pande zote husika. Mchezaji mwenyewe anatajwa kuwa tayari amesharidhia masharti binafsi ya kujiunga na klabu hiyo ya Emirates.

Kwa upande wake, mtaalamu wa masuala ya usajili barani Ulaya, Fabrizio Romano, amedai kuwa dili hilo sasa ni kama limekamilika. Kwa mujibu wa Romano, Guimaraes amekuwa mchezaji ambaye Arteta amekuwa akimuota kwa muda mrefu ili kuimarisha safu yake ya kiungo.

Arsenal wanapanga makubwa

Usajili huu unaonekana kuwa sehemu ya mkakati wa Arsenal wa kujenga kikosi kipana zaidi. Pamoja na Guimaraes, mabingwa hao watetezi wa Ligi Kuu ya England wamekuwa wakitajwa kupanga kuongeza winga mwingine na huenda wakasaka beki wa kati ili kuziba pengo linaloweza kujitokeza kutokana na majeraha ya mara kwa mara ya William Saliba.

Mashabiki wa Arsenal sasa wana kila sababu ya kutabasamu kwani ishara zote zinaonyesha kuwa kiungo huyo fundi atakuwa mchezaji wao hivi karibuni, huku Newcastle ikionekana kujiandaa kupoteza nyota wao huyo muhimu.