Carragher aibua mjadala mzito kuhusu mbinu za Michael Carrick dhidi ya Man City

Uamuzi mbovu wa Carrick lawamani

Gwiji wa Liverpool na mchambuzi wa soka, Jamie Carragher, amemnyooshea kidole kocha wa Manchester United, Michael Carrick, kwa kile alichokiita ‘kujifunga goli’ mwenyewe katika mchezo wa Manchester Derby dhidi ya Manchester City ambao United walipoteza kwa 1-0.

Licha ya United kucheza na mchezaji mmoja zaidi kwa muda mrefu baada ya Phil Foden kuonyeshwa kadi nyekundu, Carragher anaamini mabadiliko ya kiufundi yaliyofanywa na Carrick katika kipindi cha pili ndiyo yaliyoigharimu timu hiyo.

Bruno Fernandes kutumika vibaya

Katika harakati za kusaka bao la kusawazisha, Carrick alimtoa kiungo Youri Tielemans na kumuingiza mshambuliaji Benjamin Sesko. Hatua hii ilimfanya nahodha Bruno Fernandes ashuke kutoka nafasi yake ya kawaida ya namba 10 kwenda katikati ya uwanja kama kiungo mkabaji.

Carragher alionyesha kukerwa na uamuzi huo akisisitiza kuwa Fernandes ndiye mchezaji mwenye ubora mkubwa zaidi katika kikosi cha United, hivyo kumuweka mbali na eneo la hatari ni kupoteza nguvu.

“Mchezaji bora zaidi kwenye Ligi Kuu ya Uingereza, na mchezaji bora zaidi kwa mbali katika kikosi cha Manchester United ni Bruno Fernandes. Lakini yuko wapi? Anamkaba Erling Haaland dakika ya 88. Hii haikubaliki kwa mchezaji wa kiwango chake,” alisema Carragher.

‘Dalot na Dorgu hawana ubora’

Uchambuzi wa Carragher ulijikita zaidi katika kuonyesha jinsi ambavyo mbinu za Carrick ziliwafanya mabeki wa pembeni, Diogo Dalot na Patrick Dorgu, wajikute wakibeba mzigo mzito wa kutengeneza nafasi za kufunga, jambo ambalo mchambuzi huyo anaamini hawawezi kulifanya kutokana na ukosefu wa ubora.

“Tumemuona Dorgu akionyesha kiwango duni, na unapomwacha Dalot ambaye hana ubora wa kutosha katika eneo la mwisho, huku mchezaji wako bora akiwa anahangaika kumkaba Haaland, unajikuta unapoteza nafasi muhimu za kushambulia. Mpira unapokuwa miguuni mwao, unategemea nini?” aliongeza.

Kwa mujibu wa Carragher, mabadiliko hayo yalimfanya Fernandes ajikute akiwa mchezaji wa ndani kabisa uwanjani wakati wa mashambulizi, jambo ambalo lilipunguza makali ya United katika kutafuta goli la kusawazisha dhidi ya City iliyokuwa na wachezaji 10.