Jamie Carragher amchambua vikali Milos Kerkez wa Liverpool

Carragher haamini kiwango cha Kerkez

Mkongwe wa Liverpool, Jamie Carragher, ametoa maneno makali dhidi ya beki mpya wa timu hiyo, Milos Kerkez, huku akimfananisha na mshambuliaji Darwin Nunez kwa mtindo wake wa kucheza usio na utulivu. Carragher anaamini kuwa beki huyo anashindwa kusoma mchezo na kufanya maamuzi sahihi uwanjani.

Kwenye uchambuzi wake, Carragher alisema: “Uelewa wao wa mchezo ni duni sana. Unatazama mechi na kujiuliza, ‘Kwa nini amefanya hivi?’”

’Darwin Nunez wa mabeki wa pembeni’

Carragher alisisitiza kuwa Kerkez ana tatizo la kukimbia bila mpangilio, akisema kila kitu anachokifanya beki huyo kinaonekana kufanyika kwa kasi kubwa kupita kiasi bila kutumia akili ya soka.

“Nilimwelezea Kerkez msimu uliopita - na huenda ilikuwa kali kidogo wakati huo - yeye ni kama Darwin Nunez wa mabeki wa pembeni. Ni kama ‘kushusha kichwa na kukimbia’, kila kitu anachokifanya Kerkez kina kasi ya maili 100 kwa saa.”

Carragher aliongeza kuwa uwanjani, si kila wakati unapaswa kukimbia kwa kasi yako yote, bali unahitaji utulivu ili kubadili mwelekeo au kupiga pasi, jambo ambalo Kerkez anaonekana kushindwa kulifanya.

Mashaka ya Gary Neville na Roy Keane

Si Carragher pekee aliyelalamikia safu ya ulinzi ya Liverpool. Gary Neville naye amesema kuwa alishangazwa na hatua ya Liverpool kutoongeza mabeki wa pembeni wa maana katika dirisha la usajili lililopita, licha ya kuonekana kuwa na matatizo ya kiufundi msimu uliopita.

Kwa upande wake, Roy Keane aliongeza kuwa mabeki wa sasa wa Liverpool wanakosa misingi ya kawaida ya soka kama vile uwezo wa kucheza mpira kwa vichwa au kupiga pasi za uhakika. Keane alikumbusha kuwa hata Trent Alexander-Arnold alikuwa akikosoewa kwa ulinzi, lakini alikuwa na uwezo mkubwa wa kupiga pasi na kubadili mwelekeo wa mchezo, kitu ambacho mabeki wa sasa wanaonekana kukikosa.

Liverpool imefanya usajili wa wachezaji kadhaa msimu huu, lakini mashabiki na wachambuzi wanaonekana kuwa na shaka kubwa juu ya uimara wa safu yao ya ulinzi kuelekea changamoto za msimu huu.