Jamie Carragher akosoa hatua ya Arsenal kumtoa Myles Lewis-Skelly

Carragher apinga mpango wa Arsenal

Gwiji wa Liverpool, Jamie Carragher, ameeleza kushangazwa kwake na ripoti zinazoashiria kuwa Arsenal wako tayari kumtoa kiungo wao chipukizi, Myles Lewis-Skelly, kuelekea vilabu pinzani kama Manchester United na Chelsea msimu huu.

Lewis-Skelly, ambaye ameonyesha kiwango kikubwa katika kipindi cha hivi karibuni, anatajwa kuwa mmoja wa wachezaji ambao Arsenal huenda wakawaacha ili kupisha usajili mpya wa mastaa kama Bruno Guimaraes na Piero Hincapie.

”Ni jambo la ajabu”

Carragher, akizungumza kupitia kipindi cha The Overlap Fan Debate, amesisitiza kuwa kitendo cha klabu hiyo kuwa na hamu ya kumtoa mchezaji huyo kabla ya yeye kuonyesha nia ya kuondoka, ni jambo la kushangaza sana.

“Hilo ndilo jambo linalofanya kila kitu kuonekana kama ni la ajabu. Imeonekana kama Arsenal ndio wamempa ofa Manchester United kwa ajili ya Myles Lewis-Skelly. Sio Myles aliyejitokeza kusema anataka kuondoka, ndipo hapo mshtuko ulipokuja,” alisema Carragher.

Carragher aliongeza kuwa haamini kama Arsenal wangefikiria kumruhusu kijana huyo kuondoka, akiamini kuwa uwezo wake ni mkubwa sana na ana mustakabali mzuri klabuni hapo.

Uthibitisho wa uwezo wake

Gwiji huyo wa Liverpool alikumbushia baadhi ya michezo ambayo Lewis-Skelly alionyesha uwezo mkubwa, ikiwemo mchezo wa Bernabeu na fainali dhidi ya Paris Saint-Germain. Kwake yeye, kucheza katika kiwango hicho akiwa kijana mdogo ni ishara tosha ya kipaji kikubwa.

“Huwezi kucheza katika kiwango hicho kama wewe sio mchezaji wa kipekee kwa umri huo. Kila mchezaji kijana ana changamoto zake, lakini uwezo wake ni mkubwa sana kutokana na yale aliyokwisha kuyaonyesha akiwa na umri wa miaka 20. Siwezi kuamini kuwa Arsenal wangefikiria kumuachia,” alisisitiza Carragher.

Majibu ya Mikel Arteta

Kwa upande wake, kocha wa Arsenal, Mikel Arteta, amekataa kuingia kwa undani kuhusu uvumi wa usajili huo, lakini alisisitiza kuwa kuvutiwa na wachezaji wa Arsenal ni ishara nzuri kwa maendeleo ya klabu.

“Sitozungumzia uvumi. Ikiwa kuna uvumi kuhusu wachezaji wetu, hiyo ni ishara nzuri. Hiyo ina maana kuwa wachezaji wetu wanavutia umakini na wanafanya kazi nzuri,” alisema Arteta.

Arsenal sasa inakabiliwa na shinikizo la mashabiki na wachambuzi wanaohoji kwa nini klabu hiyo inaonekana kutoa kipaumbele kwa wachezaji wapya huku wakionekana tayari kuachana na chipukizi wenye vipaji vya hali ya juu kama Lewis-Skelly.