Michael Carrick awakinga kifua mabeki wake dhidi ya shutuma za Jamie Redknapp

Ulinzi wa Carrick kwa vijana wake

Kocha wa Manchester United, Michael Carrick, amejitokeza hadharani kuwatetea wachezaji wake wawili wachanga, Leny Yoro na Ayden Heaven, baada ya kupokea lawama nzito kufuatia kiwango chao katika mchezo dhidi ya Brighton katikati ya wiki hii.

Katika mchezo huo, Manchester United walijikuta wakipoteza uongozi wa mabao 2-0 na hatimaye kuchapwa 3-2. Matokeo hayo yaliibua hisia kali kutoka kwa wachambuzi, huku Jamie Redknapp akiwataja mabeki hao wawili kuwa walionyesha kiwango cha ‘ovyo’ (inept) katika mchezo huo.

Shutuma za Jamie Redknapp

Redknapp, aliyekuwa akizungumza na Sky Sports, hakusita kuonyesha kutoridhishwa kwake na jinsi wachezaji hao walivyocheza. Alisisitiza kuwa uzoefu mdogo wa wawili hao uliigharimu timu.

“Uzoefu mdogo wa mabeki hawa wawili wa kati ulidhihirika wazi. Sina shaka kuwa wawili hawa watakuwa kwenye simu zao wakimtafuta wakala wao na kujiuliza kwa nini hawachezi vizuri. Hii ndiyo sababu. Kiwango walichoonyesha leo kilikuwa cha ovyo katika kila walichokifanya,” alisema Redknapp.

Aliendelea kwa kuwalinganisha na mabeki wa Brighton, akidai kuwa vijana wa United walikuwa wakifanya maamuzi mabaya na kulalamika badala ya kujikita kwenye mchezo.

Jibu la Michael Carrick

Licha ya presha kubwa inayomkabili Carrick kufuatia mfululizo wa matokeo mabaya, ikiwemo kipigo dhidi ya Manchester City kabla ya mchezo wa Brighton, kocha huyo amekataa kuwabeza vijana wake. Anaamini kuwa ni sehemu ya mchakato wa ukuaji wao.

Carrick alieleza kuwa anawaona vijana hao kama wachezaji wenye mustakabali mzuri na kwamba wanahitaji muda wa kujifunza kupitia nyakati hizi ngumu.

“Niliona walianza mchezo vizuri sana. Sio suala la wao mmoja mmoja; naamini watajifunza kupitia uzoefu huu tofauti. Wapo kwenye nafasi nzuri sana kama wachezaji wachanga wenye mustakabali mzuri,” alisema Carrick.

Aliongeza kuwa, “Kwa bahati mbaya, unapitia nyakati kwenye soka ambapo unakuwa na vipindi vizuri, na nyakati ambapo unajifunza mengi wakati mambo hayajakwenda vizuri, lakini nisingewatenga wao wawili pekee kwa lawama hizi.”

Changamoto ya Fulham

Kwa sasa, Manchester United inajiandaa kurejea kwenye uwanja wa Old Trafford kupambana na Fulham katika mchezo wa mwisho kabla ya mapumziko ya kimataifa. Ni mchezo ambao Carrick na kikosi chake wanalazimika kupata ushindi ili kupunguza presha na kurejesha imani ya mashabiki.