Chelsea wafikia makubaliano kumnasa Lamine Camara kama mrithi wa Enzo Fernandez

Hatua mpya katika dirisha la usajili

Klabu ya Chelsea imeendelea kuwa na pilikapilika nyingi katika dirisha hili la usajili, ambapo sasa taarifa za uhakika zinaonyesha kuwa wamefikia makubaliano ya kumnasa kiungo matata wa AS Monaco, Lamine Camara. Mchezaji huyu mwenye umri wa miaka 22, anaelezwa kuwa chaguo namba moja la klabu hiyo kuziba pengo la Enzo Fernandez.

Kocha Xabi Alonso amekuwa akipata sapoti kubwa kutoka kwa uongozi wa Chelsea katika kusuka upya kikosi chake, huku klabu hiyo ikifanya kazi kubwa ya kuuza wachezaji ili kuweka sawa hesabu zao za kifedha. Katika mchakato huo, jina la Enzo Fernandez limekuwa likitajwa sana kuondoka kuelekea Manchester City.

Hatima ya Enzo Fernandez

Licha ya taarifa kusambaa kuwa Enzo Fernandez yuko mbioni kuondoka, Chelsea wameweka ngumu kwa kudai ada ya paundi milioni 120. Mwandishi maarufu wa habari za usajili, Fabrizio Romano, amethibitisha kuwa tayari Enzo amefikia makubaliano ya kibinafsi na Manchester City, lakini hadi sasa klabu hiyo ya Etihad bado haijatuma ofa rasmi.

Chelsea wameweka wazi kuwa wapo tayari kumwachia kiungo huyo wa Argentina iwapo dau lao litafikiwa, lakini sharti la kwanza ni kuhakikisha wamepata mrithi wake kwanza. Hapa ndipo Lamine Camara anapoingia kwenye mipango hiyo ya haraka.

Lamine Camara kutarajiwa London

Ripoti kutoka Ufaransa, zikiongozwa na mwandishi Lassana Camara, zimethibitisha kuwa makubaliano kati ya Chelsea na Monaco yamefikiwa. Inatarajiwa kuwa mchezaji huyu wa kimataifa wa Senegal atasafiri kuelekea jijini London kati ya Jumapili au Jumatatu hii kwa ajili ya vipimo vya afya.

Kama ishara ya kukamilika kwa dili hilo, mchezaji huyo hatojumuishwa kwenye kikosi cha Monaco kitakachocheza dhidi ya OM Jumapili hii. Haya ndiyo yaliyoandikwa na mwandishi huyo kuhusu dili hilo:

“Lamine Camara kuelekea Chelsea, jambo hili linaanza kuwa kweli! Makubaliano yamefikiwa kati ya pande zote zinazohusika. Mchezaji huyu wa Senegal anatarajiwa London kwa ajili ya vipimo vya afya kabla ya kusaini mkataba wake.”

Kwa Chelsea, kusajiliwa kwa Camara kunatazamwa kama hatua muhimu ya kuongeza nguvu katika safu yao ya kiungo, huku wakijitayarisha kwa lolote litakalotokea kuhusiana na hatma ya Enzo Fernandez kabla ya dirisha la usajili kufungwa.