Chelsea wajiondoa kwenye mbio za kumsajili Bruno Guimaraes

Chelsea wajitoa kwenye kinyang’anyiro cha Guimaraes

Wakati gumzo la usajili likiendelea kushika kasi barani Ulaya, klabu ya Chelsea imethibitisha kutokuwa na mpango wa kumsajili kiungo mahiri wa Newcastle United, Bruno Guimaraes. Hatua hii inatoa ahueni kwa Arsenal ambayo imekuwa ikipambana kwa hali na mali kumnasa nyota huyo wa Brazil.

Taarifa kutoka kwa waandishi mbalimbali wa kuaminika nchini Uingereza, zikiwemo zile kutoka kwa Ben Jacobs, Alex Crook, na Bobby Manzi, zimeeleza kwa pamoja kuwa uongozi wa ‘The Blues’ haujawahi kuwasiliana na Newcastle wala kuweka ofa yoyote kwa ajili ya mchezaji huyo. Hivyo, tetesi zilizokuwa zikihusisha Chelsea na kiungo huyo zimezimwa rasmi.

Arsenal waendelea na mikakati yao

Kwa upande wa Arsenal, klabu hiyo bado inaonekana kuwa mstari wa mbele katika kumsaka Guimaraes. Kocha Mikel Arteta ameweka wazi hitaji lake la kuimarisha safu yake ya kiungo kwa ajili ya changamoto za msimu ujao, hasa baada ya kufanya vizuri kwenye Ligi Kuu ya England na Ligi ya Mabingwa Ulaya msimu uliopita.

Ripoti zinaeleza kuwa mchezaji mwenyewe, Bruno Guimaraes, ameshafikia makubaliano binafsi na Arsenal. Hata hivyo, kizuizi kikubwa kimesalia kuwa msimamo wa Newcastle United ambao wamekuwa wakisisitiza kuwa mchezaji huyo hauzwi.

Ofa mpya ya mezani

Mchambuzi wa mambo ya usajili, Fabrizio Romano, amebainisha kuwa Arsenal wanatarajiwa kuwasilisha ofa mpya ya takriban pauni milioni 70 ili kushawishi uongozi wa Newcastle ubadili msimamo wao. Hapo awali, ofa mbili za pauni milioni 55 na pauni milioni 65 zilikataliwa na klabu hiyo ya St. James’ Park.

“Arsenal wapo tayari kutuma ofa mpya kwa Bruno Guimaraes. Wana makubaliano kamili na mchezaji huyo. Bruno amesema ndio kwa mradi wa Arsenal, lakini anataka kuwa na heshima kwa Newcastle na hataki kuvunja uhusiano wao, ingawa ameweka wazi kuwa anataka kuondoka,” alisema Romano kupitia chaneli yake ya YouTube.

Ingawa dau la pauni milioni 70 linaweza lisiwe la kutosha kuwashawishi Newcastle kuachia kiungo wao, linaonekana kama hatua ya makusudi ya Arsenal kutaka kufikia muafaka. Inafahamika kuwa klabu hiyo ya London haina nia ya kulipa kiasi kikubwa kupita kiasi ili kukamilisha usajili huo.