Chelsea wazidi kupiga hodi kwa Maxence Lacroix wa Crystal Palace

Chelsea wazidi kupiga hodi kwa Maxence Lacroix

Klabu ya Chelsea imeendelea kuonyesha nia thabiti ya kuimarisha safu yake ya ulinzi katika dirisha hili la usajili, huku beki wa Crystal Palace, Maxence Lacroix, akitajwa kuwa ndiye chaguo namba moja kwa kocha Xabi Alonso.

Taarifa kutoka kwa mtaalamu wa masuala ya usajili, Fabrizio Romano, zimethibitisha kuwa Chelsea wamekuwa wakifanya kazi kwa karibu nyuma ya pazia ili kufanikisha dili la beki huyo mwenye umri wa miaka 26. Inafahamika kuwa Chelsea wanapambana kupata angalau beki mmoja wa kati, huku kukiwa na uwezekano wa kusajili wawili kutegemea na wachezaji watakaotoka klabuni hapo.

Lacroix yupo tayari kutua Stamford Bridge

Sio siri tena kuwa beki huyo wa kimataifa wa Ufaransa ana mvuto na wazo la kujiunga na ‘The Blues’. Romano ameweka wazi kuwa Lacroix mwenyewe amefungua milango ya kuhamia London, jambo linaloifanya Chelsea kuongeza kasi ya mazungumzo na Crystal Palace pamoja na wawakilishi wa mchezaji huyo.

“Chelsea bado wanaendelea kufanya kazi kwa karibu sana kwenye dili la Maxence Lacroix. Yeye ni mmoja wa mabeki wanaothaminiwa zaidi na Chelsea. Tayari kumekuwa na mawasiliano kati ya pande zote mbili, klabu kwa klabu na hata kwa mawakala wake,” alisema Romano kupitia chaneli yake ya YouTube.

Mkakati wa Xabi Alonso

Chini ya utawala wa kocha mpya, Xabi Alonso, Chelsea wamepanga kufanya mabadiliko makubwa ili kuhakikisha wanasonga mbele na kurudi kwenye nafasi za juu katika msimamo wa Premier League, lengo likiwa ni kurejea kwenye michuano ya UEFA Champions League.

Hadi sasa, Chelsea wameshakamilisha usajili wa Marco Palestra kutoka Atalanta, huku dili la Geovany Quenda kutoka Sporting CP likiwa limekamilika tangu mwezi Machi 2025. Hata hivyo, eneo la ulinzi wa kati limepewa kipaumbele cha juu zaidi kwa sasa.

Ingawa kulikuwa na majina mengine yaliyokuwa yakihusishwa na Chelsea, kama vile Jacobo Ramon, Romano amesisitiza kuwa Lacroix anashikilia nafasi ya juu zaidi kwenye orodha ya matamanio ya klabu hiyo ya magharibi mwa London.