Chelsea wajipanga na ofa mpya kwa Granit Xhaka, Sunderland wagoma

Chelsea wazidisha presha kwa Xhaka

Klabu ya Chelsea imeonekana kutokukata tamaa katika kumsaka kiungo wa Sunderland, Granit Xhaka, baada ya ofa yao ya awali ya Pauni milioni 8 kugonga mwamba. Klabu hiyo ya jijini London inatajwa kuwa kwenye mazungumzo ya mara kwa mara ili kujaribu kumshawishi nyota huyo raia wa Uswisi ajiunge nao katika dirisha hili la usajili.

Ripoti kutoka vyombo mbalimbali vya habari vya kimataifa, ikiwemo Sky Germany na mwandishi maarufu Fabrizio Romano, zimethibitisha kuwa Chelsea wana mpango wa kurudi tena mezani na ofa iliyoboreshwa. Hii ni sehemu ya mkakati wa kocha Xabi Alonso anayetaka kuongeza uzoefu kikosini mwake badala ya kutegemea wachezaji vijana pekee.

Ofa mpya ya Pauni milioni 10 yaja

Taarifa za hivi punde zinaeleza kuwa Chelsea sasa wamejipanga kuweka mezani kiasi cha Pauni milioni 10 ili kuona kama Sunderland watalainika. Hata hivyo, inaonekana hii inaweza isitoshe kuwashawishi mabosi wa Stadium of Light.

Licha ya ofa hiyo kupanda kidogo, wachambuzi wa mambo wanaamini Sunderland bado hawako tayari kumuachia kiungo huyo aliyekuwa na msimu bora sana uliopita, akisaidia timu hiyo kumaliza katika nafasi ya saba kwenye msimamo wa Premier League.

“Chelsea wataweka ofa nyingine kwa Xhaka. Xabi Alonso ana nia ya dhati ya kufanya kazi naye tena. Sunderland wamekataa Pauni milioni 8, lakini ofa mpya ya karibu Pauni milioni 10 inakuja,” ilieleza moja ya chanzo cha habari.

Sunderland wakerwa na ofa ya Chelsea

Inaripotiwa kuwa uongozi wa Sunderland haukuifurahia hata kidogo hatua ya Chelsea kutoa ofa ya awali ya Pauni milioni 8, wakiona kama ni kiasi kidogo sana kwa mchezaji mwenye thamani kama ya Xhaka. Kumbuka Xhaka alijiunga na Sunderland akitokea Bayer Leverkusen kwa kiasi kilichofika hadi Pauni milioni 17.5.

Kuhusu hali hiyo, mwandishi Mark Brus alitoa maoni yake:

“Sina uhakika kama ofa ya Pauni milioni 10 itatosha. Viongozi wa Sunderland hawakufurahishwa na ofa ya awali ya Chelsea, na ongezeko hilo halitoshi kuwashawishi. Pia kuna swali kama wamiliki wa Chelsea wapo tayari kuwekeza zaidi kwa mchezaji ambaye hana thamani ya kuuzwa tena baadaye.”

Nini kinafuata?

Kwa upande wake, Granit Xhaka anaonekana kuwa wazi juu ya matamanio yake ya kutaka kuondoka na kwenda kufanya kazi tena na kocha Xabi Alonso, hata hivyo, mchezaji huyo bado anaendelea kuwa na subira huku akionyesha heshima kubwa kwa klabu yake ya sasa ya Sunderland.

Mazungumzo baina ya pande zote mbili bado yanaendelea, na soka la Uingereza linafuatilia kwa karibu kuona kama Chelsea watafanikiwa kufikia dau ambalo Sunderland watalikubali au kama dili hili litafeli kabisa.