Chelsea wajivunia beki mpya, watoa ufafanuzi kwa nini wamekosa saini ya Alajbegovic

Chelsea wampata Maxence Lacroix

Klabu ya Chelsea imekamilisha usajili wa saba msimu huu baada ya kumsajili beki wa kati, Maxence Lacroix kutoka Crystal Palace. Usajili huu unatajwa kugharimu kiasi cha pauni milioni 52, hatua inayolenga kuimarisha safu ya ulinzi ya vijana wa Xabi Alonso.

Lacroix, ambaye ni raia wa Ufaransa, anakuwa mmoja wa wachezaji waliosajiliwa na klabu hiyo katika kipindi hiki cha dirisha la usajili, akijiunga na wachezaji kama Morgan Rogers, Marco Palestra, Geovany Quenda, Emmanuel Emegha, Denner, na Dastan Satpaev.

Mkakati mpya wa Xabi Alonso

Tangu kocha Xabi Alonso alipochukua mikoba ya kuinoa Chelsea, kumekuwa na mabadiliko makubwa ya sera za usajili. Badala ya kutegemea vijana pekee, klabu hiyo sasa imeamua kuongeza wachezaji wenye uzoefu mkubwa ili kuleta uwiano kikosini.

Kulingana na mtaalamu wa masuala ya usajili, Fabrizio Romano, Chelsea imekamilisha mikataba ya miaka miwili ya kuwasajili Jordan Henderson na Danny Welbeck.

“Chelsea walitaka kuongeza kiungo mwenye uzoefu na kiongozi uwanjani. Ingawa umri wao umesonga kwa viwango vya soka, klabu ilihitaji uongozi huo. Henderson na Welbeck wote wamekubaliana kusaini mikataba ya miaka miwili,” alisema Romano.

Awali, Chelsea ilikuwa ikimfuatilia Granit Xhaka wa Sunderland, lakini Sunderland walikataa kumwachia kiungo huyo, jambo lililowafanya miamba hiyo ya London kuelekeza nguvu zao kwa Henderson.

Kwa nini Kerim Alajbegovic hakutua Chelsea?

Katika tukio lingine, Chelsea wamepoteza nafasi ya kumsajili mshambuliaji Kerim Alajbegovic ambaye anaelekea Juventus kwa ada ya karibu euro milioni 30.

Romano alifafanua kuwa Chelsea walikuwa na nia ya kumsajili mchezaji huyo kama sehemu ya mradi wa muda mrefu, ambapo walipanga kumtoa kwa mkopo ili aendelee kukua. Hata hivyo, mchezaji mwenyewe alikuwa na maono tofauti.

“Chelsea waliona kipaji chake lakini hawakuwa na mpango wa kumtumia kama mshambuliaji wa kuanza moja kwa moja baada ya kumsajili Morgan Rogers. Juventus wamempa nafasi ya kuwa mchezaji muhimu na kushindania nafasi ya kuanza, jambo ambalo mchezaji alilipendelea zaidi,” aliongeza Romano.

Alajbegovic alisisitiza tangu mwanzo kuwa anatamani kucheza soka nchini Italia, jambo lililofanya dili hilo la Juventus kukamilika kwa urahisi zaidi kuliko ofa ya Chelsea.