Chelsea yapigwa faini ya £10 milioni na FA kwa uvunjifu wa kanuni

Chelsea yapigwa faini ya £10 milioni na FA

Klabu ya Chelsea imejikuta ikilazimika kutoa kiasi cha pauni milioni 10 (sawa na dola milioni 13.41) kama faini kufuatia hatua ya Chama cha Soka cha Uingereza (FA) kuitoza klabu hiyo kwa uvunjifu wa kanuni mbalimbali za kihistoria.

Uamuzi huo umekuja baada ya Chelsea kukiri kufanya makosa hayo 74 ya kikanuni, hatua ambayo ilikuja baada ya klabu hiyo kujiripoti yenyewe kwa mamlaka husika wakati wa mchakato wa mabadiliko ya umiliki chini ya Todd Boehly na kampuni ya Clearlake Capital mnamo Mei 2022.

Uamuzi wa pointi na adhabu nyingine

Awali, Tume Huru ya Udhibiti ilikuwa imependekeza adhabu ya kupunjwa pointi sita, lakini Chelsea ilikata rufaa dhidi ya sehemu hiyo ya adhabu. Baada ya kusikilizwa kwa rufaa hiyo, Bodi Huru ya Rufaa ilikubaliana na klabu hiyo na kufuta adhabu hiyo ya kupunjwa pointi.

Hata hivyo, klabu hiyo imewekewa masharti mengine magumu. Chelsea itakabiliwa na adhabu ya kusimamishwa kwa usajili wa wachezaji kwa vipindi viwili (transfer windows), adhabu ambayo itakuwa ikisubiri utekelezaji wake hadi Juni 30, 2027.

Akielezea kuhusu uamuzi huo, FA ilisema:

“Chelsea FC ilikiri kufanya makosa 74 ya Kanuni E1.2 ya FA kabla ya kusikilizwa kwa kesi hiyo, na Tume Huru ya Udhibiti iliamuru faini ya pauni milioni 10 pamoja na pointi sita ambazo zingekuwa zimesimamishwa hadi Juni 30, 2027. Klabu ilikata rufaa dhidi ya adhabu ya pointi, na Bodi Huru ya Rufaa ilikubali rufaa hiyo na kuifuta adhabu hiyo baada ya kusikiliza hoja zaidi.”

Uwazi wa klabu na matumizi ya faini

Uvunjifu huo wa kanuni ulihusisha masuala ya uwekezaji kutoka kwa watu wa tatu (third-party investments) pamoja na namna klabu ilivyokuwa ikishirikiana na mawakala.

Kwa upande wake, Chelsea imesisitiza kuwa imekuwa ikifanya kazi kwa uwazi tangu ilipogundua makosa hayo ya kihistoria na kuanza kuyaripoti kwa mamlaka. Katika taarifa yake, klabu ilisema:

“Mnamo mwaka 2022, klabu ilijiripoti yenyewe kuhusu uvunjifu wa kanuni uliowezekana wa kihistoria kwa wadhibiti wote wanaohusika. Kufuatia ripoti hiyo, tumefanya kazi kwa uwazi na wadhibiti wote, ikiwa ni pamoja na kufichua kwa hiari maelfu ya nyaraka.”

FA imethibitisha kuwa faini hiyo ya pauni milioni 10 haiwezi kukatiwa rufaa na kwamba fedha hizo zitaelekezwa kwenye miradi ya kukuza soka la ngazi ya chini (grassroots football initiatives) nchini Uingereza.

Hii ni mara ya pili kwa Chelsea kukutana na adhabu ya namna hii katika kipindi cha hivi karibuni, baada ya mwezi Machi kupigwa faini ya rekodi ya pauni milioni 10.75 kwa uvunjifu wa kanuni za Premier League.