Chelsea yatoa tamko zito kuhusu mustakabali wa Estevao Willian

Chelsea yafunga mlango wa kumuuza Estevao

Kumekuwa na uvumi mwingi katika vyombo vya habari kuhusu mustakabali wa mshambuliaji chipukizi wa Chelsea, Estevao Willian, huku kukiwa na hofu kwamba staa huyo wa Kibrazil anaweza kuondoka Stamford Bridge katika dirisha dogo la usajili la Januari.

Hata hivyo, taarifa za ndani kutoka ndani ya klabu hiyo zimebainisha kuwa Chelsea haina mpango wowote wa kumuuza mchezaji huyo kinda. Licha ya kuwepo kwa ripoti zinazodai kuwa mchezaji huyo anahaha kupata nafasi ya kucheza chini ya kocha Xabi Alonso, klabu hiyo bado inamchukulia kama mmoja wa wachezaji wasioguswa (untouchable).

Changamoto ya nafasi ya kucheza

Ripoti za hivi karibuni kutoka ESPN Brasil zilidai kuwa Estevao ana wasiwasi kuhusu muda wake wa kucheza, akihisi kuwa mfumo wa Xabi Alonso haumpi nafasi nzuri ya kuonyesha uwezo wake. Inadaiwa kuwa mchezaji huyo anapendelea zaidi kucheza katikati ya uwanja, nafasi ambayo kwa sasa inashikiliwa na Cole Palmer pamoja na sajili mpya ghali, Morgan Rogers.

Kuna changamoto pia ya ushindani dhidi ya Pedro Neto katika nafasi ya winga wa kulia. Inasemekana kuwa Estevao ana hofu kuwa kumlazimisha kucheza nafasi hiyo kunaweza kumhitaji kuongeza uzito wa mwili, jambo ambalo anaamini linaweza kupunguza kasi yake na kuathiri mtindo wake wa uchezaji.

Ujumbe wa klabu kwa mashabiki

Licha ya minong’ono hiyo, mwandishi wa Striver Football, Max, ameweka wazi hali halisi iliyopo ndani ya kambi ya Chelsea:

“Estevao kwa sasa ana furaha hapa Chelsea na taarifa zinazotoka Brazil zimepindukia kidogo. Yeye ni sehemu muhimu ya mipango ya Xabi Alonso kwa siku za usoni na vyanzo vya Chelsea vinamchukulia kama mchezaji ambaye hauzwi.”

Ingawa ni kweli kwamba Estevao alijiunga na Chelsea kwa ahadi ya kuwa sehemu ya msingi ya safu ya ushambuliaji ya timu hiyo baada ya kuikataa ofa kutoka vilabu vingine vikubwa vya Ulaya, klabu inaamini kuwa bado ana umuhimu mkubwa kwenye kikosi cha sasa na cha baadaye.

Kama ilivyo ada kwa wachezaji wachanga wanaotua kwenye ligi ngumu kama Premier League, mchezaji huyo anaendelea kujifunza na kuzoea mazingira ya Stamford Bridge. Kwa sasa, mashabiki wa Chelsea wanaweza kuwa na amani kwamba kinda huyo ataendelea kubaki na kuendeleza kipaji chake chini ya utawala wa Alonso.