Chelsea yaweka ngumu kwa ofa ya Trevoh Chalobah, Liam Delap kuelekea Everton

Chelsea watafuta ofa ya Chalobah

Klabu ya Chelsea imeendelea na harakati zake za kusuka upya kikosi kuelekea msimu ujao, huku hatima ya beki Trevoh Chalobah ikionekana kuwa na utata baada ya klabu hiyo kuikataa ofa ya awali iliyowasilishwa na klabu ya Como ya Italia.

Taarifa kutoka nchini Italia zinaeleza kuwa Como walituma ofa ya Euro milioni 25 pamoja na nyongeza ya Euro milioni 2, lakini Chelsea wameonekana kutoshawishika na ofa hiyo. Mabosi wa Stamford Bridge wanahitaji kiasi cha Euro milioni 30 pamoja na nyongeza ya milioni 5 ili kumwachia beki huyo mwenye uzoefu wa Ligi Kuu ya England.

Mtaalamu wa masuala ya usajili, Fabrizio Romano, amethibitisha kuwa mchezaji huyo yupo sokoni na anaruhusiwa kutafuta changamoto mpya msimu huu. Mbali na Como, klabu ya Inter Milan pia imetajwa kuonyesha nia ya kumsajili Chalobah, ingawa beki huyo kwa sasa anaonekana kulenga zaidi majukumu yake ya kimataifa kabla ya kufanya uamuzi wa mwisho.

Liam Delap karibu kuondoka Stamford Bridge

Wakati sakata la Chalobah likiendelea, hali si shwari pia kwa mshambuliaji Liam Delap. Mchezaji huyo anatarajiwa kuondoka Chelsea msimu huu baada ya msimu wake wa kwanza uliokuwa na changamoto nyingi tangu alipojiunga na klabu hiyo akitokea Ipswich Town kwa ada ya pauni milioni 30.

Inaelezwa kuwa Everton wapo kwenye nafasi nzuri ya kumsajili mchezaji huyo mwenye umri wa miaka 23. Ripoti zinaonyesha kuwa Everton tayari wameshawasiliana na mawakala wa Delap na kuweka ofa mezani ili kumpata mshambuliaji huyo moja kwa moja.

“Chelsea wanatarajiwa kumwachia mchezaji huyo aondoke kwa kudumu, huku klabu kadhaa za Ligi Kuu ya England zikiwa na nia ya kumsajili,” ilieleza taarifa ya ndani.

Marekebisho ya kikosi yashika kasi

Chelsea wako kwenye mchakato wa kukusanya fedha ili kuimarisha kikosi chao baada ya msimu wa 2025/26 kutokuwa na matokeo mazuri. Tayari klabu hiyo imefanikiwa kumuuza beki Marc Cucurella kwenda Real Madrid, na kuna uvumi kuwa kiungo Enzo Fernandez naye anaweza kufuata njia hiyo kuelekea Hispania.

Ingawa klabu inakabiliwa na vikwazo vya kifedha kutokana na matumizi makubwa ya misimu ya nyuma, menejimenti ya Chelsea imedhamiria kupunguza idadi ya wachezaji wasiokuwa na tija kwenye mipango ya kocha ili kupata nafasi ya kufanya usajili mpya wa wachezaji wenye ubora wa juu.