Cristian Romero aondoka Tottenham: Dili lililofanikisha uhamisho wake kwenda Atletico Madrid

Uamuzi mgumu wa Spurs kumuachia Romero

Safari ya beki kisiki wa Argentina, Cristian Romero, katika klabu ya Tottenham Hotspur imefika tamati baada ya beki huyo kujiunga rasmi na klabu ya Atletico Madrid ya nchini Hispania. Uhamisho huo umekamilika kwa ada ya takriban pauni milioni 34, dili ambalo wachambuzi wa mambo wanaliona kama mkakati wa kimyakimya wa klabu hiyo ya London.

Kwa mujibu wa John Wenham, mtu wa ndani wa klabu ya Tottenham, uhamisho huu una sura ya kipekee kwani kimsingi ni kama ubadilishaji wa wachezaji (swap deal) kati ya Tottenham na Atletico Madrid. Hii inafuatia usajili wa kiungo Conor Gallagher aliyenaswa na Spurs kutoka kwa miamba hiyo ya Hispania mwezi Januari kwa ada ya pauni milioni 34.6.

‘Dili la ubadilishaji’ lisilo na malipo ya ziada

Akizungumza na Tottenham News, Wenham alieleza jinsi dili hilo lilivyokuwa rahisi kwa pande zote mbili kufikia makubaliano.

“Ilikuwa dili rahisi zaidi kufanyika kwenye soka. Tunawadaiwa kiasi cha pauni milioni 40 au asilimia kubwa ya fedha hizo kutokana na usajili wa Conor Gallagher kipindi cha majira ya baridi. Hii inamaanisha tumewabadilishia wachezaji hao; sisi hatutalipa pesa kwa Gallagher, na wao watampata Romero. Kimsingi ni ubadilishaji tu,” alisema Wenham.

Kwa nini Spurs walitaka Romero aondoke?

Ripoti zinaeleza kuwa uongozi mpya wa Tottenham ulikuwa na nia ya dhati ya kumuuza mchezaji huyo ili kupunguza mzigo wa kile kilichoitwa ‘mabaki ya enzi iliyopita’. Inasemekana kuwa Romero alikuwa na mvutano na uongozi mara mbili, jambo ambalo lilimfanya aonekane kama kikwazo katika ujenzi wa timu mpya.

Ili kuziba pengo lake, Tottenham walijipanga mapema kwa kumsajili Jan Paul van Hecke, beki anayefanana kwa kiasi kikubwa na staili ya uchezaji ya Romero, huku akionekana kuwa na utimamu wa mwili mara kwa mara zaidi.

Mustakabali wa safu ya ulinzi ya Spurs

Ingawa wengi waliamini Tottenham wangepata kiasi kikubwa cha fedha kufikia pauni milioni 60 kwa Romero, klabu imeridhika na kupata timu iliyokubali kulipa mshahara wake wote na kumnunua moja kwa moja. Hii inawapa nafasi Spurs kuimarisha safu yao ya ulinzi.

Kwa sasa, kikosi cha Tottenham kina mabeki imara kama Jan Paul van Hecke, Marcos Senesi, Micky van de Ven, na Kevin Danso. Mashabiki wanatarajia kuona muunganiko wa mabeki wawili kutoka Uholanzi, Van Hecke na Van de Ven, wakiongoza ukuta wa timu hiyo baada ya Senesi kuonyesha kiwango bora akiwa na Bournemouth msimu uliopita.