Cristiano Ronaldo aondoka kambi ya Ureno: Je, huu ndio mwisho wake?

Ronaldo aondoka kambi ya Ureno

Staa mkubwa wa soka duniani, Cristiano Ronaldo, amechukua uamuzi wa ghafla wa kuondoka kwenye kambi ya timu ya taifa ya Ureno. Tukio hili linakuja kufuatia kile kinachoonekana kuwa ni kutoridhishwa na maamuzi ya kocha mpya, Jorge Jesus, ya kumweka benchi katika mchezo wa Ligi ya Mataifa (Nations League) dhidi ya Norway.

Baada ya kuanza katika mchezo wa kwanza dhidi ya Wales na kuonyesha kiwango kisichoridhisha, Ronaldo alijikuta akiwa mchezaji wa akiba kwenye mechi iliyofuata. Hali hii inaonekana kuibua hali ya sintofahamu iliyopelekea kufanyika kwa kikao cha dharura kati ya mchezaji huyo, kocha Jesus, na rais wa Shirikisho la Soka la Ureno (FPF), Pedro Proenca.

Kauli ya kocha Jorge Jesus

Akizungumza na waandishi wa habari kabla ya mchezo dhidi ya Denmark, kocha Jorge Jesus alijaribu kutuliza upepo kwa kusisitiza kuwa hakuna mgogoro mkubwa baina yake na mchezaji huyo.

“Hakuna tukio lolote lililotokea. Mchezaji yeyote, na mimi niliwahi kuwa mchezaji, anapopasha misuli kwa dakika 20 au 30 kisha asicheze, hawezi kuwa na furaha. Nimeamua kutomtumia, na hilo si jambo la kufanya mjadala mkubwa,” alisema Jesus.

Kocha huyo aliongeza kuwa mipango yake kwa sasa inajikita zaidi kwa mshambuliaji Goncalo, huku akisisitiza kuwa atatumia wachezaji kulingana na mahitaji ya mchezo husika.

Ujumbe wa Ronaldo kwa mashabiki

Kupitia ukurasa wake wa Instagram, Ronaldo alithibitisha kuondoka kwake kambini na kuahidi kutoa ufafanuzi zaidi baadaye.

“Baada ya mkutano wa vyombo vya habari wa kocha na mazungumzo na Rais wa Shirikisho, nimeamua kuondoka kambi ya timu ya taifa. Wakati utakapofika, nitawaambia wananchi wa Ureno ukweli kuhusu sababu zilizonisukuma kuondoka. Kwa sasa, naiombea Ureno na wachezaji wenzangu kila la kheri,” aliandika Ronaldo.

Hatima ya Ureno bila Ronaldo

Wachambuzi wengi wanaona kuwa huu unaweza kuwa mwisho wa safari ya Ronaldo katika soka la kimataifa. Hata hivyo, kinyume na matarajio ya wengi, taarifa hii imepokelewa kwa utulivu wa aina yake. Hii inatajwa kuchangiwa na umakini wa dunia ya soka kuelekea sakata la kifedha linaloikabili klabu ya Manchester City, ambalo limechukua vichwa vya habari na kumfanya Ronaldo aondoke kinyemela.

Kwa wengi, huu unaonekana kuwa mwisho wa utata kwa kizazi cha sasa cha wachezaji wa Ureno, ambao sasa watakuwa na fursa ya kuonyesha uwezo wao bila kivuli cha mkongwe huyo.