Mabadiliko Makubwa Tottenham? Daniel Levy ‘Auzia’ Kikundi cha Pauni Bilioni 7 Hisa Zake za ENIC, Klabu Yaibuka na Kukanusha
Aliyekuwa bosi mkuu wa Tottenham Hotspur, Daniel Levy, anaripotiwa kufikia makubaliano ya kuuza asilimia 24.99 ya hisa zake katika kampuni ya ENIC, ambayo ndiyo mmiliki mkuu wa klabu hiyo ya Kaskazini mwa London. Taarifa hizi zimezua taharuki kubwa nchini Uingereza, huku kundi la uwekezaji lenye thamani ya pauni bilioni 7 likidai kukamilisha dili hilo, wakati wamiliki wa sasa wa klabu wakitoa msimamo tofauti.
Mwishoni mwa mwaka 2025, ilitangazwa kuwa Levy alikuwa anaacha nafasi yake kama Mwenyekiti Mtendaji wa Tottenham, na sasa inaonekana amechukua hatua nyingine ya kujitenga kabisa na miamba hiyo ya Ligi Kuu ya Uingereza (Premier League). Kuondoka kwa Levy klabuni hapo kuliamsha uvumi mwingi wa uwezekano wa klabu hiyo kununuliwa, na wawekezaji kadhaa wamekuwa wakihusishwa na Spurs kwa miezi michache iliyopita.
Makubaliano ya Daniel Levy na Eight Sports Capital
Hivi karibuni, kumeibuka taarifa kuwa Levy amekubali kuuza sehemu kubwa ya hisa zake ndani ya ENIC kwa kampuni ya Eight Sports Capital. Kama dili hili litakamilika kikamilifu, Daniel Levy atabakiwa na asilimia 4.88 tu ya hisa ndani ya kampuni hiyo mama inayomiliki Tottenham.
Msemaji wa Eight Sports Capital Limited alikaririwa akisema:
“Tunafurahi sana kusaini makubaliano haya ya kupata hisa kubwa ndani ya ENIC. Tunatarajia kufanya kazi kwa karibu na wanahisa wa klabu, uongozi, watumishi, wachezaji, na mashabiki ili kusaidia ukuaji endelevu na mafanikio ya Tottenham Hotspur.”
Licha ya taarifa hizo za kujiamini kutoka kwa wanunuzi hao, mwandishi wa habari za michezo Ben Jacobs ametoa mwanga zaidi kuhusu ukweli na utata wa sakata hili.
Pitia mtandao wa kijamii wa X, Jacobs aliandika:
“Eight Sports Capital wanadai kununua hisa za Daniel Levy ndani ya Spurs kupitia taarifa yao rasmi. Hata hivyo, Levy bado hajadhibitisha hili, na Spurs hawajatoa mawasiliano yoyote kuonyesha kuwa dili limekamilika, ingawa Eight Sports Capital wanasisitiza kuwa tayari wameshasaini makubaliano.”
Jacobs aliongeza kuwa bado kuna tahadhari kubwa kutoka upande wa Spurs kuhusu taarifa hiyo, na vyanzo vingi vya ndani vya klabu hiyo vimebaki njia panda bila kujua kama makubaliano hayo yameshasainiwa kweli au la.
Nani Wapo Nyuma ya Kampuni ya Pauni Bilioni 7?
Ripoti kutoka kwa mwandishi wa habari wa Daily Mail, Mike Keegan, inaeleza kuwa kikundi hicho kinajumuisha mwanafedha kutoka Taiwan mwenye ukwasi mkubwa. Kikundi hicho kinajumuisha Wing Fai Ng na Brooklyn Earich, ambao wote wawili walishawahi kushindwa katika majaribio yao ya awali ya kutaka kuinunua klabu hiyo ya Ligi Kuu ya Uingereza.
Mtu wa tatu aliyeongezeka kwenye kikundi hicho ni mfanyabiashara tajiri wa Taiwan, Richard Tsai.
Inaripotiwa kuwa maafisa wa klabu ya Tottenham na wawakilishi wa familia ya Lewis (ambao ndio wamiliki wakuu wa ENIC) walikuwa wakihaha usiku na mchana kujaribu kuhakiki ukweli wa madai hayo yaliyosambazwa kwenye vyombo vya habari kupitia kampuni ya mawasiliano ya kimataifa ya Sodali.
ENIC Waibuka na Kukanusha Vikali
Wakati msisimko ukiwa mkubwa miongoni mwa mashabiki wa Spurs wanaotamani mabadiliko ya kiutawala, kampuni ya ENIC imejitokeza haraka kupunguza uzito wa taarifa hizo na kuzikanusha.
Katika taarifa yao rasmi, ENIC walisema:
“Tunapenda kuthibitisha kwamba ENIC wala THFC (Tottenham Hotspur Football Club) hawana taarifa yoyote kuhusu uuzaji wowote wa hisa unaofanywa na Mfuko wa Dhamana ya Familia ya Daniel Levy (Daniel Levy’s Family Trust) ndani ya ENIC, ambayo ni kampuni mama ya THFC. Bodi ya THFC na Timu ya Utendaji bado wamejikita kikamilifu katika kutimiza ahadi tulizotoa kwa mashabiki wetu mwishoni mwa msimu.”
Mvutano huu wa taarifa kati ya kampuni ya Eight Sports Capital inayodai kununua hisa hizo, na ENIC inayokanusha kujua lolote, unaacha maswali mengi juu ya hatma ya umiliki wa Tottenham Hotspur. Je, huu ni mwanzo wa vita mpya ya kuwania umiliki wa miamba hiyo ya London kuelekea msimu mpya?