Endrick awapa presha Real Madrid, vilabu vikubwa vya England vyatajwa kumuwania

Mustakabali wa Endrick Real Madrid hatarini

Taarifa mpya kutoka nchini Hispania zinaeleza kuwa nyota kijana wa Real Madrid, Endrick, amekuwa na hali ya kutokuwa na furaha ndani ya klabu hiyo ya Santiago Bernabeu. Hali hiyo imesababisha wawakilishi wake kuanza mazungumzo na klabu mbalimbali za Ligi Kuu ya England (Premier League) kwa ajili ya kutafuta changamoto mpya.

Endrick, ambaye alijiunga na Madrid akitokea Palmeiras kwa ada inayokadiriwa kufikia £51 milioni, alitumia nusu ya pili ya msimu wa 2025/26 akiwa kwa mkopo katika klabu ya Lyon ya nchini Ufaransa. Akiwa huko, kinda huyo mwenye umri wa miaka 20 alionyesha kiwango bora kwa kuhusika katika mabao 13 (magoli sita na asisti saba) katika michezo 18 aliyocheza.

Uwanja kuwa finyu Madrid

Changamoto kubwa kwa Endrick ni kuwepo kwa ushindani mkali wa namba ndani ya kikosi cha kwanza cha Real Madrid. Ujio wa mshambuliaji Yan Diomande umemfanya kijana huyo kuhisi nafasi yake ya kucheza itapungua, jambo ambalo linatajwa kuwa kichocheo kikubwa cha yeye kutaka kutafuta heshima kwingine.

Ripoti zinaeleza kuwa mchezaji huyo anapendelea zaidi kujiunga na klabu inayoshiriki ligi ya England, na tayari timu kubwa kama Manchester United, Chelsea, Arsenal, Liverpool, Manchester City, na Tottenham Hotspur zimeonyesha nia ya kutaka huduma yake.

Masharti ya Florentino Perez

Ingawa vilabu vingi vinatamani saini ya nyota huyo, Rais wa Real Madrid, Florentino Perez, anaonekana kuwa na msimamo mgumu kuhusu namna ya kumwachia staa huyo.

Madrid wanataka kumtoa mchezaji huyo kwa njia ya mkopo pekee, sawa na walivyofanya walipompeleka Lyon, na hawapo tayari kuweka kipengele cha klabu nyingine kununua mkataba wake jumla (no purchase option). Hali hii imegawa vilabu vinavyomhitaji katika makundi mawili:

• Kundi la kwanza: Tottenham, Aston Villa na Fulham, ambao wanaonekana kuwa tayari kukubaliana na masharti ya mkopo wa kawaida bila kipengele cha kununua.
• Kundi la pili: Arsenal, Liverpool, Manchester City, Manchester United na Chelsea, ambao wameshatoa msimamo wao kuwa watazingatia kumsajili Endrick tu ikiwa mkataba huo utajumuisha kipengele cha kumnunua moja kwa moja (option to buy).

Kauli ya awali ya Endrick

Mapema mwaka huu, alipoulizwa kuhusu mustakabali wake kabla ya mambo kuwa moto, Endrick alijaribu kuwa mwangalifu na kauli zake:

“Kama itabidi nirudi Real Madrid, nitafanya hivyo kwa furaha. Na kama itabidi niende sehemu nyingine, nitafanya hivyo pia,” alisema Endrick wakati akiwa Lyon.

Kwa sasa, wawakilishi wa mchezaji huyo wanaendelea na mazungumzo na uongozi wa Madrid ili kufikia muafaka ambao utamnufaisha mchezaji huyo ambaye anahitaji muda mwingi wa kucheza ili kuendeleza kipaji chake.