Erling Haaland alalamikia maamuzi ya mwamuzi baada ya Norway kutolewa na England

Norway yaaga Kombe la Dunia kwa machungu

Safari ya Norway katika michuano ya Kombe la Dunia imeishia katika hatua ya robo fainali baada ya kupokea kipigo cha mabao 2-1 dhidi ya England katika mchezo uliochezwa hadi muda wa ziada. Matokeo haya yameacha maswali mengi, hususan kutoka kwa nyota wa Norway, Erling Haaland, ambaye hafurahishwi na namna mwamuzi alivyochezesha mchezo huo.

Kiini cha malalamiko ya Haaland ni goli la Torbjorn Heggem ambalo lilikataliwa na mwamuzi baada ya kuonekana kuwa Haaland alimsukuma Elliot Anderson wakati wa maandalizi ya goli hilo kutokea kwenye mpira wa kona.

Haaland: Uamuzi ulikuwa dhaifu

Akizungumza na kituo cha televisheni cha TV 2 baada ya mchezo huo, Haaland hakuweza kuficha hisia zake za kukatishwa tamaa na maamuzi hayo ya mwamuzi.

“Inajisikia kama kazi bure. Nilihisi tunastahili zaidi ya hapa. Sioni kama lile lilikuwa faulo. Goli lilikataliwa kwa sababu nilimsukuma Elliot Anderson chini, kitu ambacho hutokea katika kila pambano uwanjani. Ni hali ngumu kukubalika,” alisema Haaland.

Staa huyo wa Manchester City aliongeza kuwa anahisi maamuzi ya namna hiyo yanaathiri mchezo, akisisitiza kuwa kama lile ni kosa, basi angekuwa anapata faulo kila mara katika kila mechi kutokana na jinsi anavyokabiliana na mabeki.

Kauli nzito ya Alf-Inge Haaland

Sio Erling pekee aliyeonyesha kukasirishwa na matokeo hayo. Baba mzazi wa mshambuliaji huyo, Alf-Inge Haaland, aliingia kwenye mtandao wa X na kutoa shutuma nzito akidai kuwa Norway “iliibiwa” katika mchezo huo.

Katika moja ya jumbe zake, Alf-Inge alimshambulia Jude Bellingham na mwamuzi, akisema: “Hongera Bellingham na mwamuzi.” Baadaye aliongeza: “Kweli? Tumeokolewa na mwamuzi. Natumai mtashinda kombe sasa, lakini nahisi tumeibiwa leo.”

Maoni ya wachambuzi

Kauli hizo za familia ya Haaland zimeleta mjadala mkali miongoni mwa wachambuzi wa soka nchini Uingereza. Ian Wright amemkosoa Alf-Inge akidai kuwa anaonyesha wivu na “sour grapes” kwa maoni yake hayo. Wright alisisitiza kuwa lile lilikuwa kosa dhahiri na Haaland hakuhitaji kuwa na ukali kiasi hicho kumpiga msukumo Anderson ambaye ni mfupi zaidi yake.

Kwa upande wake, Roy Keane alionekana kutofurahishwa na kitendo cha baba huyo cha kuweka wazi hisia zake hadharani. Keane alidai kuwa ni kawaida kwa familia kuwa na hisia kali baada ya mchezo, lakini akaongeza kuwa baada ya muda kupita, ni vigumu kubisha kuwa mwamuzi ndiye aliyewagharimu.

“Unaweza kubishana kuhusu maamuzi kadhaa, lakini huwezi kusema mwamuzi ndiye aliyetufanya tufungwe,” alihitimisha Keane.