Erling Haaland atishia kuondoka Man City endapo watafungiwa kushiriki Ligi Kuu

Hatari inayoikabili Manchester City

Mustakabali wa Manchester City nchini Uingereza umegubikwa na utata mkubwa kufuatia tuhuma nzito za ukiukwaji wa kanuni za kifedha (FFP) kati ya mwaka 2009 na 2018. Klabu hiyo inakabiliwa na tuhuma 114, na tayari taarifa zinaeleza kuwa Ligi Kuu ya Uingereza (Premier League) inashinikiza adhabu kali, ikiwemo uwezekano wa kushushwa daraja.

Hali inazidi kuwa tete baada ya ripoti kubainisha kuwa huenda klabu hiyo ikafukuzwa hata katika ligi za chini za EFL, jambo ambalo linaweza kuifanya Manchester City kujikuta katika wakati mgumu wa kisheria na kiutawala.

Haaland hataki kubaki kwenye ‘kivuli’

Kati ya wachezaji nyota walio katika hatari ya kuondoka Etihad iwapo hali itakuwa mbaya, mshambuliaji Erling Haaland ndiye anayezungumziwa zaidi. Ripoti kutoka kwa mwandishi Pete O’Rourke zinaeleza wazi kuwa, kinara huyo wa mabao hayupo tayari kusalia klabuni hapo kwa ajili ya ujenzi mpya endapo timu hiyo itashushwa daraja.

“Klabu inafahamu vyema kwamba Haaland hayupo tayari kubaki na kuisaidia timu kupambana kurudi kwenye kilele,” ilieleza ripoti hiyo.

Licha ya kuwepo kwa minong’ono mingi, imebainika kuwa hakuna kipengele maalum (relegation clause) katika mkataba wa mchezaji huyo mwenye umri wa miaka 26 ambacho kingemruhusu kuondoka kwa bei rahisi endapo timu itashuka daraja. Hivyo, yeyote atakayemhitaji atalazimika kutoa dau nono kwani Haaland bado yupo katika kiwango chake bora zaidi.

Arsenal waingilia kati

Katika hali inayoashiria mipango ya muda mrefu, klabu ya Arsenal inatajwa kuanza hatua za awali za kufuatilia hali ya nyota huyo. Washika mtutu hawa wa London wamekuwa wakitafuta mshambuliaji wa daraja la dunia kwa muda sasa, na fursa ya kumnasa Haaland inaweza kubadili mwelekeo wa soka la Uingereza kwa miaka ijayo.

Real Madrid pia wanatajwa kuwa miongoni mwa klabu zinazofuatilia kwa karibu sakata hili la Manchester City ili kuona kama wanaweza kumsajili fowadi huyo. Hata hivyo, kwa sasa, mashabiki wa soka wanaendelea kusubiri uamuzi wa mwisho kuhusu adhabu itakayotolewa dhidi ya Man City, jambo ambalo ndilo litakalochochea mabadiliko makubwa katika kikosi chao.