Everton wakaribia kumsajili Joshua Zirkzee kutoka Man Utd, dili la Balogun lumba lumba

Everton wabadili upepo, wamlenga Zirkzee

Klabu ya Everton inaripotiwa kuwa kwenye hatua za mwisho za kukamilisha usajili wa mshambuliaji wa Manchester United, Joshua Zirkzee, wakati matumaini ya kumsajili Folarin Balogun kutoka AS Monaco yakizidi kupotea.

Baada ya kumruhusu mshambuliaji wao, Beto, kujiunga na Fiorentina, Everton wamejikuta wakihitaji haraka mshambuliaji mpya ili kuimarisha safu yao ya ushambuliaji, kwani kwa sasa Thierno Barry ndiye pekee anayebaki kama mshambuliaji mzoefu kikosini.

Dili la Balogun latikiswa na vipimo vya afya

Awali, Everton walikuwa wamefikia makubaliano ya kulipa kiasi cha Euro milioni 45 kwa ajili ya kupata huduma ya Folarin Balogun. Hata hivyo, habari zilizopo zinaashiria kuwa dili hilo linaweza kuvunjika kabisa.

Taarifa mbalimbali za ndani zinasema kuwa Balogun ameshindwa kufuzu vipimo vya afya (medical) katika klabu hiyo ya Merseyside. Pamoja na changamoto hiyo, vyanzo vingine vinaeleza kuwa Monaco bado wanashinikiza dili hilo likamilike kwa sababu wanahitaji kuingiza fedha kupitia mauzo ya mchezaji huyo.

Kufuatia hali hiyo, inaonekana mipango ya Monaco imebadilika kwa kiasi kikubwa, huku kukiripotiwa kuwa kiungo wao, Lamine Camara, sasa yupo mbioni kujiunga na Chelsea kwa ada ya Euro milioni 50.

Zirkzee ndiye chaguo jipya

Kutokana na kusuasua kwa dili la Balogun, Everton wameelekeza nguvu zao kwa Joshua Zirkzee wa Manchester United. Mwandishi Alan Myers na mtaalamu wa usajili Fabrizio Romano wamethibitisha kuwa tayari mawasiliano yameanza kati ya pande hizo mbili, baada ya Manchester United kukataa ofa kadhaa kutoka klabu za Italia.

Ben Jacobs, mwandishi wa habari za ndani, amedai kuwa:

“BREAKING: Joshua Zirkzee kujiunga na Everton kwa mkopo ni jambo linalokaribia kukamilika.”

Taarifa zaidi zinaeleza kuwa mkataba huo wa mkopo unatarajiwa kuwa na kipengele cha Everton kuwa na uwezo wa kumsajili moja kwa moja mchezaji huyo (buy option) mwishoni mwa msimu, ingawa thamani kamili ya kipengele hicho bado haijawekwa wazi.

Hali hii inaendelea kuweka shauku kwa mashabiki wa Everton, wakisubiri kuona ni nani hatimaye atavaa jezi ya klabu hiyo katika safu ya ushambuliaji kabla ya dirisha la usajili kufungwa.