Fabrizio Romano atoa mrejesho kuhusu Bradley Barcola na Liverpool

Liverpool bado wanapambana kumnasa Barcola

Sakata la uhamisho wa winga hatari Bradley Barcola kwenda Liverpool limeendelea kushika kasi huku kukiwa na taarifa tofauti kuhusu hatma ya mchezaji huyo kutoka Paris Saint-Germain (PSG). Ingawa kumekuwa na tetesi za Arsenal nao kuvutiwa na huduma ya mchezaji huyo, mtaalamu wa masuala ya uhamisho, Fabrizio Romano, ametoa utulivu kwa mashabiki wa ‘The Reds’.

Kwa mujibu wa Romano, mazungumzo kati ya Liverpool na PSG yamekuwa yakiendelea kila siku, ingawa mchakato huo unachukua muda mrefu kuliko wengi walivyotarajia.

Hali ya mazungumzo ya sasa

Liverpool wamekuwa wakihangaika kufikia muafaka na PSG kwa wiki kadhaa sasa. Awali, miamba hiyo ya Ufaransa ilikuwa ikitaka kitita cha Euro milioni 170, kiasi ambacho Liverpool waliona ni kikubwa mno. Hata hivyo, taarifa zinaonyesha kuwa PSG wameshusha kidogo bei hiyo na sasa wanahitaji kati ya Euro milioni 130 na 150.

Liverpool walishawahi kuona ofa zao za Euro milioni 100 na 115 zikikataliwa, lakini inasemekana wako mbioni kuongeza ofa yao kufikia takriban Euro milioni 136.5 ili kumshawishi mmiliki wa PSG.

Akizungumzia hali hiyo, Romano alisema:

Bradley Barcola amekuwa miongoni mwa sakata kubwa la majira haya ya joto. Nimekuwa nikisema tangu mwezi Mei kuwa Barcola anakwenda Liverpool na bado nina matumaini makubwa kwa sababu Liverpool wanafanyia kazi dili hili. Mazungumzo ni ya kila siku na PSG.

Arsenal wananyemelea?

Kuna taarifa ambazo zimekuwa zikizunguka kuwa Arsenal wanaweza kuingilia kati dili hili iwapo wataona Liverpool wanashindwa kufikia mwafaka na PSG. Hata hivyo, Romano anaamini kuwa Liverpool wako kwenye nafasi nzuri zaidi ya kukamilisha usajili huu.

Romano aliongeza kuwa mchezaji huyo pamoja na Ibrahim Mbaye wameendelea kuwekwa pembeni katika kikosi cha PSG kwa ajili ya michezo ya mwishoni mwa juma, jambo linaloashiria kuwa PSG nao wako tayari kuwatafutia changamoto mpya.

Ingawa dili hili linaonekana kusuasua, mwandishi huyo maarufu alihitimisha kwa kusema:

Sijui kama litakamilika siku ya mwisho ya dirisha la usajili au kabla ya hapo, lakini mazungumzo yataendelea hadi mwisho kabisa. Liverpool wako ‘ndani’ kabisa ya dili hili na wanafanya kila wawezalo.