Gary Neville amtaja mchezaji aliyekuwa usajili mbaya zaidi Manchester United

Neville afunguka kuhusu usajili wa ovyo Old Trafford

Beki wa zamani wa Manchester United, Gary Neville, ameweka wazi maoni yake kuhusu wachezaji waliosajiliwa na klabu hiyo tangu kumalizika kwa enzi ya Sir Alex Ferguson mwaka 2013. Kwa mtazamo wake, klabu imefanya maamuzi mengi mabovu kwenye dirisha la usajili ambayo yamechangia kushuka kwa kiwango cha timu.

Katika mahojiano na The Athletic, Neville alipotakiwa kutaja usajili mbaya zaidi ndani ya miaka 13 iliyopita, alimweka winga wa Kibrazil, Antony, juu ya orodha yake. Ingawa alimtambua Angel Di Maria kama mmoja wa wachezaji walioshindwa kung’ara, Neville anaamini Antony ndiye anaongoza kwa sababu ya gharama kubwa zilizotumika kumsajili.

“Nilikuwa na msisimko mkubwa na Di Maria, nilidhani ni usajili bora. Ana kasi, uwezo wa kucheza kote uwanjani, lakini alishindwa kuzoea mazingira. Hiyo ilikuwa mbaya,” alisema Neville.

“Lakini ukiangalia gharama kubwa zilizotumika, Antony ndiye usajili mbaya zaidi. Hii siyo dharau kwa kijana huyu, bali ni kioo cha jinsi Manchester United walivyokurupuka kutumia pesa nyingi kumsajili.”

Kuhusu Marouane Fellaini, ambaye mara nyingi amekuwa akitajwa na mashabiki kama usajili mbaya, Neville alimtetea kwa kusema kuwa Fellaini alijituma na gharama yake haikuwa kubwa kama ilivyo kwa Antony.

Mason Mount yupo mashakani

Wakati mjadala wa usajili ukiendelea, mshambuliaji wa zamani wa United, Louis Saha, ametoa mtazamo wake kuhusu kiungo Mason Mount. Saha anaamini kuwa klabu ilifanya kosa kutafuta mbadala wa kiungo huyo mwenye thamani ya pauni milioni 60 wakati wa dirisha la usajili lililopita.

Saha anadai kuwa licha ya Mount kuwa mchezaji mzuri, haonyeshi uwezo wa kubadili mchezo au kubeba jukumu la kuiongoza timu wakati wa presha, kama wanavyofanya wachezaji wenye hadhi ya juu.

“Mason Mount ni mchezaji mzuri, lakini siyo aina ya mtu anayeweza kuongeza kasi ya mchezo kwa Manchester United. Amekuwa na majeraha mengi, lakini hajanithibitishia kuwa anaweza kuwa na mchango mkubwa kusaidiana na Bruno Fernandes kwenye wakati mgumu,” Saha aliiambia Betano.

Changamoto za soko la usajili

Saha pia aligusia utendaji wa klabu katika sokoni, akieleza kuwa huenda Manchester United walishindwa kumpa kocha Michael Carrick msaada anaohitaji. Kulingana na Saha, klabu ilikuwa na hofu ya kutumia pesa nyingi, jambo ambalo lilifanya wasipate malengo yao ya kwanza (first choice targets).

“Tatizo la Manchester United siyo wachezaji mmoja mmoja tu. Wanahitaji kutafuta uwiano sahihi ili waweze kucheza kwa mtindo utakaowawezesha kupenya ngome za wapinzani,” alihitimisha Saha.