Gary Neville: Manchester United wapo katika hali mbaya zaidi chini ya Carrick

Kiwango cha United chaibua mjadala

Gwiji wa Manchester United, Gary Neville, ametoa shutuma nzito kwa timu yake ya zamani kufuatia kiwango chao duni katika mchezo dhidi ya Fulham uliochezwa uwanjani Craven Cottage. Neville amesisitiza kuwa United haitafika popote chini ya kocha Michael Carrick kama wachezaji wataendelea kucheza kwa mtindo wa “kutembea” uwanjani.

Mchezo huo ulishuhudia nafasi nyingi za kufunga kwa pande zote mbili, lakini Neville alionekana kukerwa zaidi na jinsi timu hizo mbili zilivyokuwa zikicheza soka la bila mpangilio na ukosefu wa umakini katika ulinzi.

”Kama wachezaji wa mazoezi”

Wakati akitoa maoni yake akiwa kwenye chumba cha utangazaji, Neville alikosoa vikali utayari wa wachezaji wa United kuzuia mashambulizi ya Fulham. Alielezea kuwa ulinzi wa United ulikuwa wa msingi mno kiasi kwamba wachezaji walionekana kama vikaragosi (mannequins).

“Angalia jezi za bluu (Man Utd) sasa hivi – wanatembea. Hupaswi kutembea uwanjani, nasikitika kusema hivyo. Unatakiwa kuwa tayari na kusogea muda wote. Hii si sawa na hakuna timu kati ya hizi mbili inayoweza kupiga hatua mbele kwa mtindo huu wa kucheza,” alisema Neville.

Neville aliongeza kuwa nishati ni kitu muhimu sana katika soka, na kusema kuwa tatizo hilo linaweza kuwa linatokana na hofu au kujiamini kupita kiasi, jambo linalofanya mchezo uonekane wa hovyo.

Dakika 15 za aibu

Baada ya Fulham kupata bao kupitia kwa Lisandro Martinez aliyejifunga mwenyewe baada ya shambulizi la Calvin Bassey, Neville alilipuka kwa hasira zaidi. Alikiri kuwa kipindi hicho cha dakika 15 baada ya bao hilo kilikuwa cha kusikitisha zaidi kuwahi kushuhudiwa na yeye akiiangalia United tangu akiwa na umri wa miaka mitano.

“Nimekuwa nikiifuatilia Manchester United tangu nikiwa na miaka mitano, na hiyo ndiyo dakika 15 mbaya zaidi kuwahi kuziona. Ni ya kusikitisha sana (pathetic). Wamekuwa wakitembea tu uwanjani kwa dakika 15 mfululizo,” Neville alimalizia kwa masikitiko.

Kauli hii ya Neville inakuja wakati presha ikizidi kupanda kwa Carrick, huku mashabiki na wachambuzi wakiendelea kuhoji mwelekeo wa timu hiyo katika msimu huu wa Premier League.