Granit Xhaka anatafuta njia ya kutua Chelsea kufanya kazi na Xabi Alonso

Xhaka anataka kuungana na Xabi Alonso

Kiungo mkongwe Granit Xhaka ameripotiwa kuwa kwenye shinikizo kubwa la kutaka kuondoka Sunderland na kujiunga na Chelsea katika dirisha hili la usajili la majira ya joto. Mchezaji huyu mwenye umri wa miaka 33, ambaye kwa sasa yupo na timu ya taifa ya Uswisi kwenye michuano ya Kombe la Dunia, anaonekana kuvutiwa sana na fursa ya kufanya kazi tena na kocha Xabi Alonso.

Taarifa kutoka kwa mtaalamu wa masuala ya usajili, Fabrizio Romano, zinasema kuwa tayari kuna makubaliano ya maneno kati ya kiungo huyo na klabu ya Chelsea. Alonso na Xhaka waliwahi kufanya kazi kwa mafanikio makubwa walipokuwa Bayer Leverkusen, ambapo walitwaa taji la Bundesliga msimu wa 2023/24.

Changamoto za usajili

Ingawa Chelsea wameonyesha nia ya dhati, Sunderland wanaonekana kutokubali kirahisi kuachana na kiungo huyo. Inafahamika kuwa ofa ya awali ya Chelsea ya pauni milioni 8 ilikataliwa na klabu hiyo ya Sunderland, ambao walimsajili Xhaka mwaka 2025 kwa ada ya pauni milioni 17.5.

Hata hivyo, inasemekana Chelsea wanajiandaa kuongeza dau hilo kufikia pauni milioni 10 ili kuwashawishi Sunderland wamruhusu mchezaji huyo kurejea London. Romano amedokeza kuwa Chelsea wako siriazi sana na wanapambana kumaliza dili hilo mapema iwezekanavyo.

Ushawishi wa Xabi Alonso

Ushawishi wa Xabi Alonso ndani ya Chelsea umekuwa mkubwa sana tangu ajiunge na klabu hiyo. Hivi karibuni, mchezaji mchanga Marco Palestra, aliyesajiliwa kutoka Atalanta, alikiri wazi kuwa Alonso ndiye aliyemshawishi kujiunga na “The Blues”.

Akizungumzia ushawishi huo, Palestra alisema:

“Ilikuwa muhimu sana. Nahisi nguvu kubwa kutoka kwake. Yeye ni mmoja wa makocha bora duniani kama unavyoweza kuona alichokifanya kule Bayer Leverkusen. Ni muhimu sana kwangu kuwa na Xabi Alonso kama kocha.”

Palestra aliongeza kuwa mazungumzo yake na Alonso yalikuwa na mwelekeo chanya, ambapo kocha huyo alimweleza wazi mipango yake na jinsi anavyotaka timu icheze. Hii inadhihirisha jinsi falsafa ya Alonso inavyovutia wachezaji wengi, na sasa macho yote yanabaki kwa Xhaka kuona kama ndoto yake ya kuungana na kocha huyo Stamford Bridge itatimia.