Harry Kane kuvutia vigogo, Al-Hilal yafanya mazungumzo na wawakilishi wake

Al-Hilal inajipanga kumnasa Harry Kane

Mshambuliaji matata wa Bayern Munich, Harry Kane, amejikuta kwenye rada za klabu mbalimbali duniani kutokana na kiwango chake bora msimu uliopita. Taarifa mpya zinaeleza kuwa klabu ya Al-Hilal ya Saudi Arabia imeanza kufanya mazungumzo na wawakilishi wa mchezaji huyo ili kujaribu kumshawishi ajiunge nao.

Kane, mwenye umri wa miaka 33, alikuwa na msimu mzuri sana akiwa na Bayern Munich ambapo alifunga mabao 61 katika michezo 51 aliyoichezea timu hiyo katika michuano yote. Pia, alionyesha uwezo wake katika Kombe la Dunia kwa kuifungia Uingereza mabao sita.

Uvumi wa kurejea Premier League

Licha ya kuwepo kwa tetesi kuwa Manchester United na klabu yake ya zamani, Tottenham Hotspur, zina nia ya kumsajili mshambuliaji huyo, vyanzo vya karibu vimebainisha kuwa Kane hayupo kwenye harakati za kutaka kurejea ligi ya Uingereza (Premier League) kwa sasa. Tottenham imekuwa ikionyesha nia ya kutaka kumrudisha nyota huyo, hususan sasa wakiwa chini ya kocha Roberto De Zerbi, lakini inaonekana sio kipaumbele cha mchezaji huyo.

Ofa ya Al-Hilal na msimamo wa Bayern

Al-Hilal inaripotiwa kuwa imewasilisha mipango yao ya kuvutia kwa kambi ya Kane na iko tayari kutoa ofa kubwa zaidi kuwahi kushuhudiwa kwa mshambuliaji katika ligi ya Saudi Arabia. Hata hivyo, taarifa za ndani zinaeleza kuwa dili hilo linaonekana kuwa gumu kufanikiwa kwa sasa.

Kwa upande mwingine, Bayern Munich imeshaanza mazungumzo na Kane kuhusu mkataba mpya. Mtaalamu wa masuala ya usajili, Fabrizio Romano, amedokeza kuwa kuna matumaini makubwa ya pande zote mbili kufikia mwafaka.

“Mazungumzo kati ya Bayern Munich na kambi ya Harry Kane kuhusu mkataba mpya yameshaanza nyuma ya pazia. Kuna majadiliano yanaendelea, na kuna matumaini ya kufikia makubaliano ya Kane kubaki klabuni hapo,” alisema Romano.

Kwa sasa, Bayern na Kane wanajadiliana vipengele mbalimbali vya mkataba huo mpya, ikiwemo muda wa mkataba na kuwepo kwa kipengele cha kuondoka (exit clause) ambacho kimekuwa kikijadiliwa kwa umakini mkubwa.