Hossam Hassan alipuka: Wanataka Messi abaki Kombe la Dunia

Hasira za kocha wa Misri baada ya kuondolewa

Kocha mkuu wa timu ya taifa ya Misri, Hossam Hassan, ametoa hisia zake nzito baada ya timu yake kutupwa nje ya mashindano ya Kombe la Dunia katika hatua ya 16 bora. Katika mchezo uliokuwa na msisimko mkubwa dhidi ya mabingwa watetezi, Argentina, Misri ilijikuta ikipoteza mchezo huo licha ya kuongoza kwa mabao 2-0 hadi dakika za lala salama.

Hassan ameweka wazi kuwa hatatazama tena mchezo wowote wa michuano hiyo inayoendelea, akidai kuwa kulikuwa na njama za makusudi za kuhakikisha Lionel Messi na timu yake ya Argentina wanaendelea kusonga mbele kwa maslahi ya fedha na sifa ya mashindano.

Lawama kwa waamuzi

Kocha huyo hakuficha hisia zake kuhusu maamuzi ya waamuzi uwanjani, akidai kuwa Misri ilinyimwa haki yake ya msingi. “Haki haikutendeka kwetu. Tulipaswa kupata penalti na tulifutiwa bao ambalo sijui sababu za msingi za kufutwa kwake,” alisema Hassan kwa masikitiko.

“Ni suala la pesa. Wanataka Messi abaki kwenye mashindano. Katika soka, mambo mengi hutokea nje ya uwanja kwa sababu ya maslahi binafsi. Kilichotokea hakikuwa cha haki. Misri ilistahili kufuzu; sisi tulikuwa timu bora zaidi uwanjani.”

Katika mchezo huo, bao la Misri lililofungwa na Mostafa Zico dakika ya 62 lilikataliwa na VAR kwa madai ya madhambi kabla ya mpira kufika wavuni. Aidha, Misri ililalamikia penalti ambayo hawakupewa baada ya Hamdy Fathy kuvutwa ndani ya eneo la hatari, jambo lililoongeza chuki ya kocha huyo pale Argentina walipopata bao la ushindi dakika ya 92.

Kujivunia wachezaji wake

Licha ya matokeo hayo mabaya, Hossam Hassan alionyesha kuridhishwa na kiwango kilichoonyeshwa na vijana wake. Alisifu mbinu walizozitumia, ambazo zilikuwa tofauti na mtindo wake wa kawaida wa kujilinda.

“Ninaridhika sana na juhudi walizozionyesha. Wachezaji wetu wengi wanatoka ligi ya ndani ya Misri, tofauti na wachezaji wa timu nyingine ambao wengi wanacheza soka la kulipwa Ulaya. Pamoja na hali hiyo, tulionyesha uwezo wa kushindana na yeyote,” alisisitiza kocha huyo.

Hassan alihitimisha kwa kusema kuwa anaumia sana kwa ajili ya mashabiki wa Misri ambao walikuwa na matumaini makubwa ya kuona timu yao ikisonga mbele, lakini anaamini kuwa wachezaji wake walifuata vyema maelekezo ya mwalimu na kucheza kwa moyo mkubwa.