Ismaila Sarr ataka kwa udi na uvumba kutua Liverpool

Sarr anatamani changamoto mpya Anfield

Ripoti kutoka Uingereza zinaeleza kuwa mshambuliaji wa kimataifa wa Senegal, Ismaila Sarr, ana shauku kubwa ya kujiunga na klabu ya Liverpool. Mchezaji huyo anadaiwa kuwa amefikia uamuzi wa kutaka kuondoka Crystal Palace ili kupata changamoto mpya chini ya kocha Andoni Iraola.

Sarr, ambaye amekuwa na mafanikio makubwa tangu ajiunge na Crystal Palace mwaka 2024 ikiwemo kushinda taji la FA Cup, FA Community Shield, na Conference League, anaamini kuwa muda wake wa kuondoka Selhurst Park umewadia. Inaelezwa kuwa kambi ya mchezaji huyo inaona ametoa mchango mkubwa na sasa anahitaji kupima uwezo wake katika ngazi ya juu zaidi ndani ya kikosi cha Liverpool.

Mazungumzo yanaendelea

Fenway Sports Group (FSG), wamiliki wa Liverpool, wanaendelea na mazungumzo na Crystal Palace ili kuona kama wanaweza kufikia makubaliano kabla ya dirisha la usajili kufungwa wiki ijayo. Awali, ofa ya pauni milioni 50 iliyowasilishwa na Liverpool ilikataliwa na klabu hiyo ya London.

Hata hivyo, Liverpool hawajakata tamaa na inasemekana wanaandaa ofa nyingine mpya ili kuwashawishi Palace waachie nyota huyo. Mwandishi Sacha Tavolieri amethibitisha kuwa Liverpool wanafanya msukumo wa dhati, huku klabu ya Al Ittihad ya Saudi Arabia ikifuatilia kwa karibu hali hiyo iwapo dili hilo litashindikana.

Msimamo wa Pierre Sage

Kocha wa Crystal Palace, Pierre Sage, alipoulizwa hivi karibuni kuhusu mustakabali wa Sarr, alisisitiza kuwa bado mchezaji huyo ana mkataba wa miaka mitatu.

“Kwa sasa yuko nasi kwa sababu ana mkataba wa miaka mitatu, na si rahisi kuondoka. Ninaelewa kuwa kupata mawasiliano ya namna hii kutoka kwa klabu nyingine huleta mtafaruku na kusita, lakini kwa sasa yeye ni mchezaji wetu.”

Sage pia alizungumzia hali ya majeraha ya mshambuliaji huyo, akisema:

“Yuko chini ya mkataba na kwa upande wangu, yeye ni mtu mwaminifu na sina shida naye. Tunataka tu kumuona uwanjani haraka iwezekanavyo.”

Hali ya kikosi cha Liverpool

Kwa upande wa Liverpool, kocha Andoni Iraola tayari ana machaguo mengi katika nafasi ya ushambuliaji, ikiwemo Federico Chiesa, Rio Ngumoha, na Cody Gakpo. Hata hivyo, kuna tetesi kuwa Gakpo anaweza kuondoka klabuni hapo huku klabu za Tottenham Hotspur na Manchester City zikionyesha nia ya kumhitaji. Aidha, Liverpool inahusishwa na mipango ya kumsajili Bradley Barcola kutoka Paris Saint-Germain, ikionyesha wazi kuwa wanatafuta kuimarisha zaidi safu yao ya mashambulizi.